Endama Platformê Cinîyan ê Şahmarane Gulîzare Îpek ANFyî rê qisey kerd û ard ziwan ke têkoşînê cinîyanê Îran û Tirkîya do mezgê barbarî bin bikerê.

Îpeke ANFyî rê qisey kerd û vist vîrî ke Jîna Emînî seba ke gijikê ci asayêne ameye qetilkerdene û vat: ''Ma reyna dî ke dewletê camêrdan senî xîret kenê ke bedenê cinîyan de bibê wayîrê heqî. Îran de Jîna Emînî; Tirkîya de Garîbe Gezer, Gulistane Dokû, Şûle Çet, Denîze Poyraz ameyî qetilkerdene. Rixmê qirkerdişan zî cinîyan qetî xoverdayîşî ra fek vera nêda. Nika pêro cinîyê dinya vanê 'cinîye, cuye, azadîye.' Ma dî ke felsefeya 'cinîye, cuye, azadîye' vila bena.

Tek hêzo ke komelî bi hawayêkê têdûşt û azadî do bivurno cinî yê. Tirkîya de seba ke îqtîdarê AKP-MHPyî dişmenîya cinîyan keno qirkerdişê cinîyan hende zêdîyayo. Rejîmê Îranî zî heman faşîzmî keno. Mezgê Tirkîya û Îranî yew o. Nika serkêşîya cinîyan de Îran de serewedaritişêko pîl est o. Dewlete seba ke verê ney bigêra qirkerdişan kena.''

Îpeke pare kerd ke Şorişê Rojawanî zî seba pêro cinîyan bîyo hêvî û vat: ''Şorişê Rojawanî yê cinîyan bi şorişê cinîyan, demokrasî û têdûştîye. No şoriş bi hêvîya pêro cinîyan. Ez pê bawer a ke serewedaritişê Îranî zî do bivurîyo şorişî. Xoverdayîşê cinîyan ê Îranî do sey Rojawanî bibo hêvîya cinîyan. Cinîyê Îran û Tirkîya do nê mezgê barbarî birijnê.''