Ewro Tirkîya sey fermî Pêkerdişê Îstanbulî ra xo peyser anceno. Wekîla HDPyî ya Kocaeli Zuleyha Guluma ke derheqê babete ANFyî qisey kerd hêrişê vera deskewteyanê cinîyan sey mendekerdişê faşîzmî name kerdî.

Zuleyha Guluma ke avûkatîya cinîyan ê ke raştê hêrişê dewlete-camêrdî ameyî kerde û meseleyanê cinîyan kirişena Meclîs wina qisey kerd.

''Pêkerdişê Îstanbulî pê têkoşînê cinîyan ame destfînayene. Pêkerdişêko bitesîr o. Eke raşta bêro caardene verê şîdetê camerd-dewlete yê vera cinîyan zafê ci yeno girewtene. Pêro şîdetî nêqedîneno la kêmyeno. No pêkerdiş têna qala hukmî nêkeno. Verî berpirsîyarîya dewlete ano vîr. Hema ke cinîyî şîdetî rê rî bi rî nêmendê komel de şîdetê vera cinîyan kêm keno. Pêkerdiş vano ke wa cinî û camêrd seyyewbînan bêrê destgirewtene û cinîyî heqanê xo yê bnigêyînan bieşke bişuxulnê. La hukmat herinda caardişê nê pêkerdişî tim vera ci bi û tewr peynî de zî pê waştişê yew merdimî ame betalkerdene. No îqtîdar tim vera destkewteyanê cinîyan o. Verê nê pêkerdişî zî muanqeşeyê nafaka û kurtajî estbî.''

Gulume wina dewam kerd: ''Ma yew proses de yê ke wazenê heme destkewteyanê cinîyan destê înan ra bîgêrê û cinîyan keyeyan de heps bikerê. Wexto ke mi avûkatîye kerdêne zî mi zaf çî dîyî. Cinîyê ke derheqê ci de qerarê pawitişî esto yenê kiştene. Rixmo ke xeylêk rey muracatê kenê ,vanê 'mi kişeno' cinîyî nênê pawitene û yenê qetilkerdene. Cinîyê ke xo pawenê cezayanê pîlan genê û la camêrdê hêrişkarî zîndanî ra cade vejîyenê. Pê nê kerdişan wazenê rejîmê neweyî ronê. Hukm, huqûq û edalet çîn ê. Îqtîdar eşkera vano ke înan huqûq wedart o kerdişanê xo sey meşru ramojneno. Eşkera vano ke o do qerarê Mehkemeya Heqanê Merdiman a Ewropa nêro ca. Îqtîdar vano ke yewna tewirê îdareyî awan kerdo. Heme heqê demokratîkî yenê binpaykerdene, vera kedkeran sîstemê koletîye yena caardene û vera kurdan şer yeno kerdene. No îqtîdar pê nê kerdişan wazeno faşîzmî sey dezgehêk bikero mende.''

Zuleyha Gulum qiseykerdişê xo pê nê vatişan qedîna: ''Cinîyan rê goreyê xo rol fasilnenê. Vanê ma do keyeyî bikerê bimbarek û sey esas bîgêrê ke cinîya makbule tede ya. Wazenê cinîya ke vengê xo nêvejan, wayîrê heqanê xo nêvejîyena verê sîstemê camêrdî mile xo çewt kena, biafernê. Xora têkoşînê cinîyan vera nê hêrişan çirey peyser game nêeşte. Cinîyî wextê OHAL de zî meydanan de bî. Cinîyanê ke reya xo daya nê îqtîdarî ê zî wayîrê Pêkerdişê Îstanbulî vejîyenê. Coka qerar nêame Meclîs yew şewe de bi qerarê yew merdimî ame betalkerdene. Nika qale Meclîsî de nêya. Wekîlê îqtîdarî zî tersê Qesre ra nêeftanê qal bikerê. Ma sey cinîyan kam yew partîye ra benê wa bibê ganî ma semedê heqanê cinîyan bibê yew la wekîlê îqtîdarî semedê pawitişê kursîyanê xo tewrê xoverdayîşê hemparî yê cinîyan nêbenê.''