Îsatanbul de 21ê kanûne de serkêşîya Komeleya Rojnamageran a Dicle Firat (DFG), Komeleya Rojnamegeran ê Cinîyan a Mezopotamya (MKG) û çapemenîya DÎSKî  de semedê rojnamegeran Nazim Daştan û Cihane Bilgin ê ke Rojawan de hetê dewleta tirke ra ameyî qetilkerdene, eşkerayîya çapemenîye ameye orgazîkerdene. Polîsan Meydanê Şişhaneyî de hêrişê eşkerayîye kerd û 59 kesî destbend kerdî.

Nînan ra 45 kesî badê îfadeyî mudîrîya polîsan ra ameyî veradayene û 14 kesî edlîye rê ameyî sewqkerdene. Mehkeme de 2yê ci sîyasetmedar û 7ê ci rojnamegerî 9 kesî bi îdîaya 'propagandaya rêxistine û vervejîyayîşê qanûnê çalakîyan' ameyî tepiştene. 5 kesê bînî bi şertê kontrolê edlîyî ameyî veradayene.

Nameyê rojnamegeran wina yê:  Gulîstane Dursun, Hayrî Tunç, Enes Sezgîn, Osman Akin, Can Papîla, Pinare Gayîp û Serpîle Unal.'' 

Rojnamegeran bi rayîrê avûkatanê xo mesajê xo şawit û vat: ''Qesrî do birijîyê. Êyê ke xo ver danê do bimanê, têkoşînê Nazim û Cîhanan do bimano. DFG yew dezgehê çapemenîye yo ke nêno krîmînalîzekerdene. Rojnamegerîye sûc nîya.''

Badê qerarê tepiştişê 7 rojnamegeran verê Edlîyeya Çaglayanî de eşkerayîye ameye dayene. Xeylê rojnamegerî tewrê eşkerayîye bîyî. Rojanamegeran vat: ''Ma do sey rojnameran tim raştîye bipawê.''

Rojnamegere Zeynep Kuraya ke serbest  ameye veradayene nê vatî: ''Ma bi derbkerdişî tepiştî û kelemçeyî peykî dayî destanê ma ro. Ma têşan û vêşan verdayî û vera ma huqûqê dişmenîye ame caardene. Seba ke embazanê ma dovîzî kiriştî ameyî tepiştene. Mesaj danê ma. Vanê qala meseleya kurdan mekerê. Ma do wayîrê embazanê xo bivejê. Nê welatî de rojnamegerê ke Îsraîl qetil kerdî yenê yadkerdene la rojnamegerê ke Tirkîya qetil kerdî çew nêeşkeno yad bikero. Ma do bêveng memanê.''

Rojnameger Mahsun Saglam zî ard ziwan ke ê bi mergî ameyî tehdîtkerdene û vat ê do tim raştîye vajê.