Hemserekîya Konseya Rayberdişî ya KCKyî bi eşkerayîyêke qurbanê Qirkerdişanê Mereş, Roboskî û Parisî yad kerdî. Eşkerayîye wina ya:

''Menga kanûne sey menga qirkerdişanê dewleta tirke derbazê tarîxî bîye. Qirkerdişê Mereşî, Qirkerdişê Roboskî, Qirkerdişê Parisî yo Diyîn, Qirkerdişê Zîndanan ê 2000î nînan ra tayên ê. Ma nê qirkerdişan şermezar kenê. Ma Nazim Daştan û Cîhane Bîlgîn ê ke hêrişê peyênî yê dewleta tirke de şehîd bîyê bi rêz û minetî yad kenê. Ma sozê ke dayo şehîdan newe kenê.

Qirkerdişê Mereşî seba ke çarçewa planê qirkerdişê kurdan de rojawanê Firatî kurdan ra bêro xalîkerdene amebi caardene. Çunke rojawanê Firatî sînorê Tirkîya yo zî. Coka dewleta tirke kerd ke tîya ra qirkerdişê kurdan bida destpêkerdene û vilayê pêro Kurdîstanî bikera. Şarê ma yo ereb-elewî raştê qirkerdişî ame, dîya koçkerdene, demografîya herême ameye vurnayene. Hema zî nê polîtîkayî hetê AKP-MHPyî ra yenê caardene û vilayê pêro Kurdîstanî yenê kerdene. Îşxal û planê vera Rojawanî zî îsbatê ney ê.

Qirkerdişê Roboskî zî ê serebûtan ra yew o ke raştîya dewleta tirke ya qirkere veta werte. Tîya de dewijî bi bombayan bi barbarî ameyî qetilkerdene ke zafê nînan doman bîyê. Rixmo ke 13 serrî derbaz bîyê hema zî mesuldarê qirkerdişî nêameyî muhakemekerdene û Erdogano ke ferman dayo nê qirkerdişî paweno. Erdoganî pîlot û selahîyetdarê nê qirkerdişî fîraz kerdî. Roboskî de ame dîyene ke polîtîkaya dewlete qirkerdişê kurdan o.

23yê kanûna 2022tî de Paris de Endama Konseya Rayberdişî ya KCKyî Evîne Goyî, hunermend Mîr Perwer û welatperwer Abdurrahman Kizil ameybî qetilkerdene. No qirkerdiş sey Qirkerdişê Parisî yê Diyînî derbazê tarîxî bi. Eşkera yo sey ê yewinî no zî bi îstîxbarat û destekê welatanê Ewropa hetê dewleta tirke ra ameyo kerdene. Nê qirkerdişî de tewr zaf dewleta Fransa binê tometî de menda. Fransa seba ke ney ra bixelisa ganî nê qirkerdişan roşnî bikera. Şarê kurdî ney paweno.

Bi wesîleya serrgêranê nê qirkerdişan ma venga şarê ma, dostanê ma, hêzanê şorişgêranê demokratîkan danê ke ancax bi pûçkerdişê plananê dişmenê qirkerî û bi pîlkerdişê têkoşînî hesab yeno persayene. Ganî ma têkoşînî pîlêr bikerê, vera hêrişanê qirkerdişî xoverdayîşî pîlêr bikerê û plananê dişmenî bixeripnê. Ma venga pêro kesan danê ke vera hêrişanê serê Rojawanî her ca de xoverdayîşî aver berê.''