Serkêşîya Platformê Dezgehanê Demokratîkan de, çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de Amedî ra ver bi Anqara Rayraşîyayîşê Azadîye û Çareserîya Demokratîke dewam kena. Temsîlkaranê rayraşîyayîşî ra Temsîlkaranê partîyan û rêxistinanê komelê sivîlî ajansê ma rê qisey kerd.

Îdarekarê MEBYA-DERî Mehmet Emîn Kiliçî bale ante girîngîya Rayraşîyayîşê Azadîye ser û vat: ''No rayraşîyayîş seba newekerdişê prosesê haştîye yo. Bi serran o ma hê dejî ancenê. Ganî no adir biqedo. Wa tecrîdê vera Birêz Ocalanî wedarîyo. Ganî hukmat gamanê hewceyan bierzo.''

Hemserekê DBPyî yê Amedî Mehmet Şîrîn Gurbuzî vat: ''Ma statuyêkê asayî û haştîya rûmetêne wazenê. Ma nê rayraşîyayîşî de bi zelalî îqtîdarî rê vanê ke muxatabê çareserîye dîyar o coka wa tecrîd bêro wedaritene.''

Îdarekarê DEM Partî yê Riha Celaleddîn Erkmenî vat: ''Seba ke meseleya kurdan bi metodanê demokratîkan û haştîyaneyan çareser biba ma tîya de yê. Ganî no feraseto tekperest hinî biqedo. Sûrîye de, Rojawan de şer wa biqedo. Îqtîdar seba haştîye wa mesuldarîya xo bîyaro ca.''

Hemserekê DEM Partî yê Dîlokî Mehmet Satanî vat: ''Rayraşîyayîşê Aadîye rayraşîyayîşê seba şar û bawerîyan o. Meseleyanê tewr pîlan ra yewe meseleya kurdan a û ma wazenê ke wa mesele çareser biba. Adresê çareserîye zî Birêz Ocalan o. Coka ma waştişê haştî û azadîye berz bikerê.''