Şaredarîya Bercetoyî ya ka bapesteya bajarê Parma yê  Îtalya ya paştdayîşê xo yê kurdan rê dewam kena. Şaredarîye nameyê pirdê 'Rio Rivi Freddi' (Çemo Serdin) sey Hevrîne Xelef na pa.

Sîyasetmedara kurde Hevrîne Xelef 9ê teşrîna peyên a 2019î de hêrişê îşxalî yê dewleta tirke yê vera Rojawan de hetê çeteyanê tirkan ra ameyebî qetilkerdene.

Akerdişê pirdî vizêr saetanê serê sibayî de bi. Wird peranê pirdî de tabelayêkê sero fotografê Xelefe û nuşteyê ''Semedê heqanê cinîyan têkoşîn kerd, netîceya xîyanetê ma de ameye kiştene'' esto ameyî daliqnayene.

Şaredarê Bercetoyî Luici Lucchiyî ke merasîmî de qisey kerd, vat: ''Şarê kurdî rixmê heme zordarîya ke anceno, rixmê heme qirkerdişan têkoşînê demokrasî û haştîye de israr keno. Gerek şarê kurdî tena mero verdayene.''

Reyna bi nameyê Şaredarî, Torra Paştdayîşê Şarê Kurdî û Komîteya Kurdan a Îtalya qiseykerdişî ameyî kerdene û bale ameye antene xoverdayîşê kurdan û hêrişê qirkerdişî yê vera înan ser.

Par zî Şaredarîya Berceto nameyê şorişgêro enternasyonalîst Lorenzo Orsettî (Tekoşêr Piling) dabi Îstasyonê Trenî yê Ghiare.

5ê teşrîna peyêne a 2019î de reyna heman şaredarî xelata anore ya hemwalatîye dayebî Rayberê Şarê Kurdî Abdullah Ocalanî.