Plarformê Yewîya Cinîyan ê Kurdan ê Vakurî Konferansê xo yo 3yîn 21-22yê hezîrane de bi şîarê ‘’Yewîya cinîyan ê kurdan reyde, ver bi yewîya neteweyîye’ Amed de kerde. 101 delegeyî tewrê konferansî bîyî.

Netîcenameyê konferansî ame eşkerakerdene.

Netîcename de nê birî ameyî girewtene:

‘’-Ewro caardişê yewîya neteweyîye seba cinîyan ê kurdan vera îmha, asîmîlasyon, qirkerdiş ûsn yew mecburîyet o. Konferansê ma seba nê armancî do bibo hêzo tewr dînamîk û vurnayox.

 -Cinîyî do berardişê kulturî de hîna zaf rol bigêrê û seba yewîya huner û kulturî her serre festîvalanê kultur û hunerî bikerê.

-Cinîyî seba ke kurdkî neslanê bînan rê biresnê do mesuldarî bigêrê xo ser, têkoşînê ziwanî aver berê, seba statu û perwerdeyê bi ziwanê dayîke bixebitê.

-Konferansê ma do vera şîdetî cinîyan rêxistin bikerê, xopawitişî aver berê û xeta têkoşînî ya hempare awan bikero.

-Konferansê ma paştî dano prosesê haştîye. Naye ser o ma do perspektîfê demokratîk, ekolojîk û azadîgîrê cinîyan ê Abdullah Ocalanî de aktîf rol bigêrê û seba ney paştdayîşê cinîyan xurtêr bikerê.

Konferansê ma bi yewkerdişê vîr, tecrube û hêvîyanê cinîyan dewrêkê neweyî îlan keno. Hêzê têkoşînê cinîyan ê kurdan do înşaya komelê demokratîkî de rol bikero. Cinîya azade reyde, komelê azadî, kulturê azadî, ziwan û nasnameyê azadî mumkîn benê. Biciwîya yewîya cinîyan ê kurdan! Biciwîya têkoşînê cinîyan ê kurdan o hempar! Jin Jiyan Azadî!”