Pîsporê Rojhelatê Mîyênenî Prof. Dr. Abbas Valiyo ke bitaybetî bi xebatanê xo yê ke derheqê kurdan de kerdî, yeno naskerdene, vengdayîşo tarîxî yê Rayber Apoyî û averşîyayîşê ke dima qewimîyayî, ANFyî rê erjnayî.

Prof. Dr. Valiyî bale ante raştîya argumananê vindarnayîşê têkoşînê çekdarî yê Rayber Apoyî ser û nê vatî:“ Têkoşînê çekdarî yê vera Tirkîya hinî waştişê xo ard ca. Hedefêkê nê têkoşînî bibi o xora hetê PKKyî ra ame caardene. No têkoşîno çekdar eşkeno dahîna zaf dewam bikero la feydeyê ci ne kurdan ne zî dewleta tirke rê est o. Ne tirkî û ne zî kurdî û PKKyî nêeşkenê nê şerî bi çeke qezenc bikerê. Rojhelatê Mîyanênî de şertê jeopolîtîkî bedilîyayî û na rewşe de tay rewşî hewce kene.” 

Prof. Dr. Abbas Valiyî ard ziwan ke kurdî çend sîyasetê sîvîl û demokratîkî biwazê zî dewleta tirke hema gamê goreyê rûhê prosesî nêeştî û nê vatî: “Kurdan zaf gamî eşt ê la dewlete cewabê nê gaman nêda. Goreyê fîkrê mi vindarnayîşê têkoşînê çekdarî û ronayîşê çeke eynî çî nîyo. Têkoşîno çekdar eşkeno bêro vindarnayene la ronayîşê çeke yanî bi temamî teslîmkerdişê ci çîyo cîya yo. Ronayîşê çeke têna netîceya gamanê xurtan ê dewleta tirek yê ke azadîya Rayber Apoyî zî tede ya, mumkun o. Heta ke dewleta tirke çîyêk nêkero ronayîşê çekan gama raşte nîya.”

Abbas Valiyî vat Têgêrayîşê Azadîye yê Kurdan têkoşînê çekdarî caverdo zî zaf muhîm o ke têkoşînê sîyasîyî rê dewam bikero, têgêrayîşî bipawo û wina dewam kerd: “Têgêrayîş îdeolojî ra dahîna muhîm o. Têgêrayîş pêro çîyanê bînan ra dahîna muhîm o. Gerek no têgêrayîş bêro pawetene. Têgêrayîş biaçarîyo prosesê sîyasî zî gerek miheqeq bêro pawitene. Eke no têgêrayîş çîn bo ne muhîmîya rayberî ne zî ya îdeolî maneno. Nika hetê sîyasetî ra ma merhaleyêka newî de yê. Hamleyê dîplomatîkê neweyî benê, têgêrayîşê kurdan xo newe keno. Na rewşe barê rayberîya têgêrayîşî zî giran kena. Gerek têgêrayîşê leşkerî biaçarno têgêrayîşê sîyasîyî. No zî karanê tewr zoran ê sîyasetî ra yew o. Ma no Afrîkaya Başûre de dî, cayanê bînan de zî dî. Seba ke no ser bikewo gerek verî têgêrayîş awanîya xo newera rone. Waştişo esasî yê nê awanî gerek pawitişê têgêrayîşî bo. Seke mi vat: Qet çîyêk nê têgêrayîşî ra dahîna muhîm nîyo.”