Rojnamegera rojnameyê Ozgur Gelecekî Perîhane Sevda Erkilinç Zîndanê Bakirkoyî de tepişîyena. Perîhana ke Roşanê Karkeran ê 1ê Gulane ra verî sereştişê keyeyî de tepişîyabî nêweşa astim û çolyakî ya. Rewşa Perîhane her ke şino bena xirabêr. Hemserekê Pêroyî ya ÎHDyî Erene Keskîn Perîhane zîyaret kerde û derheqê babete de ajansê ma rê qisey kerd.

Erene da zanayene ke nêweşê çolyakî ganî werdê bêglutenî biwerê û vat: ‘’Rixmo ke îdareyê zîndanî ney zaneno hetê werdî ra Perîhane zor û zehmetîye ancena. Perîhane zaf zeîf bibî. Waştişê aye yê sewqê revîrî zî nêno caardene coka a nêeşkena dermananê xo bigêra.

Rewşa aye ya weşîye bena xirabêr. Xora zîndanî cayê winayênî nîyê ke tede nêweşê çolyakî bêrê tepiştene. A hem nêeşkena werd biwera hem zî nêna berdene bi doktorî. Perîhane Sevda rojnameger a û karanê xo yê rojnamegerîye ra tepişîyaye. Na rewşe bi xo binpaykerdişê heqan o.

Hetêkî ra qalê haştîye yeno kerdene la hetê bînî ta  tedayî zêdîyenê. Merdimê ke karê xo kenê tepişîyenê û nêweş kewenê. Na rewşe nêna qebulkerdene. Ganî Perîhane Sevda Erkilinç cade vera bidîya.’’