Cinîyan çar merkezanê Îstanbulî û qezaya Kadîfekale ya Îzmîrî de bi şîarê 'Wext wextê serkewtişî yo'adirê Newroze vist ta.

Têgêrayîşê Cinîyan ê Azadan taxa Konakî ya Kadîfekale de bi beşdarîya Wekîla HDPyî Serpîke Kemalbay û dadîya Denîze Poyraz Fehîme Poyraz adirê Newroze vist ta û şayîyêke viraşte. Cinîyî bi meşaleyan ver bi waro ke tede Rehşane Demîrel 1992 de bedenê xo de adirê Newroze vistbi ta, şîyî. Cinîyan pankarta 'Wext wextê azadîya cinîyan o' akerd û bi muzîkî govende girewte. Şayîye de sloganê sey 'Denîze Poyraz bêmerg a, Newroze fîraz ba, Şehîdî nêmirenî' ameyî berzkerdene.

Îstanbul de çar merkezan Bagcilar, Sultanbeylî, Esenyurt û Beylikduzu de serkêşîya TJA û Meclîsê Cinîyan ê HDPyî de adirê Newroze ame tavistene û şayîye ameye kerdene. Cinîyî bi kincanê xo yê herêmîyan tewrê şayîye bîyî.  Şayîyan de sloganê sey 'Cinîye, Cuye, Azadîye' ameyî vatene. Şayîyî bi govendan qedîyaye.