Kampa Multecîyan a Şehîd Rûstem Cûdîyî de şarî xoverdayîşê vera ablûqa, ambargo û tepiştişan roja şeşine de  sozê selahîyetdaranê Iraqî ser o qedîna.

Dima ke 3 endamê heyetê Mexmûrî agêrayîşê Bexdadî de tepişîyabî şarî dest pê çalakîya xeyme kerdibî.

Selahîyetdaranê dewleta Iraqî soz da ke ê do tepişteyan vera bidê û meseleyan bi dîyalogan çareser bikerê.

Hemsereka Meclîsê Şarî yê Mexmûrî Fîlîze Budak derheqê babete de eşkerayîye daye û vat: ‘’Ma vera ambargoyî dest pê çalakîya xeyme kerdibî. Şarê ma tewrê çalakîye bi û nêrazîbîyayîşê xo ard ziwan. Şarê Mexmûrî 30 serrî yo vera neheqîyan xo ver dano û wazeno ke meseleyan bi dîyalogan çareser bikero. Rayber Apoyî ‘Vengdayîşê Haştîye û Komelê Demokratîkî’ kerd. Ma zî na çarçewe de do heqanê xo biwazê. Na kampe kampa xoverdayîşî ya. La netîceya kombîyayîşan de ma bire daye ke na çalakîye ewro biqedînê.’’