Şaro ke kantonanê Tebqa, Reqa û Cizre ra semedê protestokerdişê hêrişanê dewleta tirke û paştdayîşê şervananê QSDyî şi Awbendê Tişrînî, roja diyîne de nobeta xo rê dewam keno. Çalakwananê ke ANFyî rê qisey kerd vat ê do destur medê îşxalî.

Îbrahîm Ebdi: ''Rîyê hêrişanê dewleta tirke ra yew aşme yo ke awe û ceyranê ma birîyeno. Awbendê Tişrînî binê rîskê girdî de yo. Her hele bêno ke biteqo û bajarê ma binê awe de bimanê. Ganê bi mîlyonan kewno tehluke. Nê awe, herre, awebendî yê ma yê û şervanê ke nînan pawenê ê zî ewladê ma yê. Konvoyê ma ame hedefgirewtene ke ma bitersnê la ma do çirey peyser game meerzê. Ma tîya de yê û qerardar ê.Se beno wa bibo ma do desturê îşxalî medê. Şarî do miheqeq ser bikewê.''

Edûl Mehmûd Xêrzada: ''Ma Tişrîn de têkoşînê xo kenê tewrê tekoşînî. Ma desan rey dîrek ameyî hedefgirewtene. Merdimê ma qetil kerdî la ma peyser game nêeşte. Ma bi xoverdayîşê xo est ê, ma do bi xoverdayîşî ser bikewê. Awbendê Tişrînî yê şaranê Rojawanî yo. Ma do xoverdayîşî rê dewam bikerê. Xoverdayîş û şerê ma semedê azadîye yê.''

Fethî Mislim: ''Ma semedê pawitişê Awbendê Tişrînî tîya de yê. Eke ma awbendê xo mepawê cuyeya ma kewna tehluke. Senî ke ma 2014 de bi xoverdayîşê Kobanê ser kewtî 2025 de zî ma do bi xoverdayîşê Tişrînî ser bikewê. Semedê pawitişê herre û awa xo ma paştî danê xoverdayîşê QSDyî. No tewiro bianor ê şarî yo. Roje roja pawitişê herre û destkewteyanê xo ya.''