Endamê Konseya Rayberdişî yê KCKyî Zubeyîr Aydarî ANFyî rê rojdem ercna.

Aydarî bale ante ser ke rejîmê Sûrîye yo nikayên nîşaneya Sûrîyeya demokratîke nîyo û vat: ''Merkezê krîzê Sûrîye de Tirkîya est a. Tirkîya verî destek da Baasî la dima destek da Îhvan-i Muslîmîn. Seba ke na polîtîka zî ser nêkewte çeteyan ra Artêşa Milî ya Sûrîye awan kerde. 

Dewleta tirke kena ke Sûrîye de kurdî wayîrê statuyêkî nêbê. Dewleta tirke ya ke Efrîn, Girê Sipî, Serêkanîyê de sûcê şerî kerdê kena ke herême de pakîya etnîke bikera.''

Aydarî vist vîrî ke 5-6ê sibate de Bruksel de derheqê sûcanê şerî yê dewleta tirke de mehkemeyêka sivîle do Zanîngehê Azadî yê Brukselî (ULB) de bêra ronayene.  Aydarî vat: ''Îdîanameyo ke do bêro amadekerdene, do Tirkîya rê bêro erşawitene ke wa pawitişê xo bikera.''

Aydarî pare kerd ke serebûtê Sûrîye û Rojawanî û hêrişê vera Rojawanî dewam kenê. Aydarî vat: ''Rayber Apoyî de pêvînayîş ameyo kerdene û ey mesajê zelalî dayî. Ey bi zelalî vat ke herinda şerî de ganî haştîye bêra caardene. Rayber Apo muxatabê çareserîye yo verên o. Ganî goş nêro dayene spekulasyonanê dewlete. Ma ganî nê prosesî de bi baldarî têbigêrê. 

Ma sey têgêrayîşî tim paştî do bidê xîretanê haştîye. La ganî ma tedbîranê xo zî bigêrê. Seba ke Rayber Apo çareserîye bîyaro ca ganî bi rehetî têbigêro. Mîyanê çar dêsan de o do nêeşko rolê xo bi aktîfî bîyaro ca. Mîyanê çar dêsan de pêro îmkanan ra bêpar yeno verdayene. Her çî ra ver ganî şert û mercî têdûşt bibê û Serok Apo bieşko bi azadî têbigêro.

Helbet pêvînayîşê DEM Partî yê bi Rayber Apoyî girîng o la ganî partîyê bînî zî şorê Îmraliyî û Rayber Apo de pêvînayîşan bikerê. Ganî heyetê CHPyî zî şoro Îmraliyî.

Hemleya 'Abdullah Ocalanî rê Azadîye, Meseleya Kurdan rê Çareserîya Demokratîke' ganî bi xurtî dewam bikera. Ganî her kes na hemle de cabigêra. Nika ra pey azadîya Rayber Apoyî her çî ra girîngêr a.''