Endamê Komîteya Rayberdişî ya PKKyî Murat Karayilanî cewab da persanê ajansê ma û rojdem ercna.

Qiseykerdişê Karayilanî ra tayê noqtayê girîngî wina yê:

''Rayber Apoyî pêvînayîşê xo yê bi heyetê DEM Partî de mesajê girîngî dayî. Rayber Apoyî vat ke wa pêro terefî û aktorê sîyasîyî bê hesabanê demkîyan înîsîyatîf bigêrê. Rayber Apoyî vat ke zemînê çareserîye yo tewr girîng Meclîs o û ganî wayûbiratîya kurd û tirkan bêra qewetkerdene. 

Rayber Apoyî seba çareserîya meseleya kurdan tim xîretêko pîl kerd. Nika Heyetê DEM Partî partîyanê cîya-cîyayn de pêvînayîşan keno. Ma sey têgêrayîşî paştî bidê  proses ke Rayber Apo do îdare bikero. Têgêrayîşê ma pabesteyê Rayber Apoyî yo û perwerê ci yo.

Meseleya kurdan bi nêzdîbîyayîşanê terefgîran çareser nêbena. Heta nika dewlete û îqtîdarî sînyalê çareserîye zî nêda û ê tim şîdet û şerî ra qal kenê. Ma fam kerd ke tay selahîyetdarê dewlete Rayber Apoyî de pêvînayîş kenê la îqtîdar hema nînan qebul nêkeno. Seba menfaetanê şarê kurdî û tirkan nê xîretî qîmetîn ê. Heta nika bi resmî çîyêk nêame vatene. 

Ziwano ke medya seba Rayber Apoyî şuxilnena, ziwanê şerê taybetî yo. Ziwanê medya, bi taybetî ziwanê medyaya îqtîdarî  ziwanêko provakatîf o. Seke ê hê xîretanê çareserîye pûç kenê.  Rayber Apo hetê kurdan ra sey lîderî hesibîyeno coka nêzdîbîyayîşê winayênî yê verê ey çinhesibnayîşê kurdan o. Tay organê medya zî vanê ke 'PKK qels bîyo' ûsn. Eke wina bibîyêne dewlete do nêşîyêne verê berê Îmraliyî. Ganî no uslûb û ziwan bêrê vurnayene. Bi şer û tehdîtî haştîye nêna.

 Seba ke kurdî prosesî rê bawer bikerê ganî dewlete ney bikera. Tecrîd, hêrişê îşxalî, operasyonê leşkerî û sîyasîyî dewam kenê. Yanî polîtîkayê şîdetî hê dewam kenê. Sîyasetê Tirkîya wazeno ke bi eksenê Rayber Apoyî meseleya kurdan bêra çareserkerdene. Seba ney zî ganî ziwanê şerî bêro terkkerdene. 

 Erdogan vano ke ganî PKK cade çekanê xo rono nêbo ê do çekanê ma bigêrê. Eke wina yew hêzê şima est o, şima çira heta nika nêeşkayî bikerê? Ma seba ê çîyanê ke pê bawer kenê do bi her hewayî fedakarîye bikerê. Ma do verê gefan de qetî sereyê xo nêdanê xo verî.   Eke proses hetê Rayber Apoyî ra bêro îdarkerdene ma do tim paştî bidê ci. Dewleta tirke ya çareserîye do bîyara ca ya zî neçare bimana ke qebul bikera. Êyê ke vanê qey bi şîdetî her çî çareser bikerê xelet ê.  

Rojhelato Mîyanên newe ra heno dîzaynkerdene. Meseleya kurdan de Rojawan pancereyêka bîn a. Dewleta tirke bahane kena ke Rojawan de PKK est o la na zûr a. Rojawan de sempatîzanê ma est ê la hêzê ma, îdareyê ma çin ê.  Rojawan de îdareyêko xoser est o. 

A raşte goreyê plananê 27ê teşrîna peyêne hêzê HTŞyî do heta Hama bişîyêne, çeteyê SMOyî zî pêro warê Îdareyê Xoserî bivistêne destî. La Qereqozax û Tişrîn de hêzê SMOyî teng mendî. Yanî şerwanan Rojawan pawit.

Nika gefê vera Kobanê est ê. Hêzê QSDyî bi qerarê xo Til Rifet û Minbicî ra vejîyayî la hinî cayê bînî ra do nêvejîyê. SMO xora nêeşkeno hêrişê Kobanê bikero. Eke dewleta tirke hêrişê Kobanê bikera zî do hîrê serran şer dewam bikero. 

Kurdî hinî sey verî nîyê; şerî ra, sîyasetî ra, dîplomasî ra fam kenê. Coka gefê sey 'Ma do pirodê bigêrê' betal ê.

Xîretê çareserîye yê Rayber Apoyî zaf girîng ê û ganî paştî bidîyê ci. Eke îqtîdarê AKP-MHPyî hetê raştî ra nêzdîyê ci nêbo do bin bikewo. Şarê kurdî zî şarê Tirkîya zî çareserîye wazenê. Rayber Apoyî tercîhê şarê kurdî nayo werte. Eke şima ney bi taktîkanê şerê taybetî bigêrê û şer de israr bikerê do bin bikewê. Seba welatî xîretê Rayber Apoyî firsend ê. Hinî hemsengîyî vurîyayî. Hinî îmkanî est ê ke kurdî û hêzê şorişgêrî ser bikewê.''