Sîyasetmedara kurde Aysele Tugluka ke hemsereka verêne ya sîstemê hemserekîye ya,  hedefê dewleta tirke de ya.

Aysele Tugluk dêrsimij a la 17ê temmuza 1965î de Xarpêt de dadîya xo ra bîya. Dima ke babîyê ci merdo keyeyê Tugluke şîyo Îstanbul. Aysele Tugluk Fakulteya Huqûqî ya Zanîngehê Îstanbulî qedînena û sey avûkate xebitîyena. Aysele Tugluk verî bena Endama Heyetê Rayberdişî yê Cigêrayîşanê Komelkî û Huqûqî, dima zî bena ronayoxanê Komeleya Cinîyan ê Welatperweran ra yewe.

Aysele Tugluk avûkata verêne ya Rayberê Şarê Kurdî Abdullah Ocalanî ya zî. Tugluke weçînayîşê 12ê hezîrana 2011î de bena wekîl, dima zî tewra HDPyî bena. 17ê adara210î de qiseykerdişê ci ra cezaya zîndanî ya 2 serran dîyena ci.

Aysele Tugluk kanûna 2016î de ameye destbendkerdene, dima zî bi bahaneya 'endamîya rêxistine' tepişîyaye. 2ê çeleyê 2018î de 1 serre û 6 mengan, 17ê adara 2008î de 10 serran cezaya zîndanî dîyaye ci û nika Zîndanê Kandira de tepişîyena.

13ê êlula 2017î de dadîya Tugluke Hatune Tugluk şîye heqîya xo. Komêka nîjadperestan ê tirkan Anqara de hêrişê cenazaya aye kerd. Seba ke reyna vera cenaza hêriş nêro kerdene cenaza Dêrsim de ameye definkerdene.

Aysele Tugluk zîndan de bi nêweşîya demansî kewte û 2021 de rewşa ci bîye giranêr. Seba ke Aysele Tugluk bêra veradayene hetê cinî, sîyasetmedar, roşnvîr, hunermend û dezgehan ra kampanya û çalakîyî yenê kerdene.

Aktîvîsta Têgêrayîşê Cinîyan ê Azadan (TJA) û Hemsereka Partîya Herêmanê Demokratîkan (DBP) ya Amedî Sevale Gulmez derheqê babete de ANFyî rê qisey kerd.

Gulmeze ard ziwan ke îqtîdarê AKP-MHPyî mîyanê kaosî de yo û wazeno heyfê xo cinîyan ê kurdan ra bigêro. Gulmeze vat: ''pê tepişîyayîş û polîtîkayanê şerê taybetî ê nêeşkenê verê têkoşînê cinîyan ê kurdan bigêrê. Çunke zemîn û polîtîkaya înan de problem esto. Heta ke no çareser nêbo şer zî do dewam bikero. Aysele Tugluk rixmê nêweşîyanê xo hema zî tepişte ya. No sûcê vera merdimîye yo. Cinîyê kurdî mehkumê mergî yenê kerdene. Şexsê Aysele Tugluk de vera sîstemê hemserekîye, sîyasetê cinîyan, îrdeyê cinîyan û pêro cinîyan ê kurdan hêriş yeno kerdene.''

Gulmeze da zanayene ke seba ke Aysele Tugluk bêra veradayene kampanyayan kenê û xebitîyenê. Gulmeze vat: ''Ma do têkoşînê Ayselan qetî erdî ser de meverdê. Xoverdayîş heq o û ma do nê xoverdayîşê xo rê dewam bikerê. Ganî ma vengê xo seba Aysele berz bikerê û bibê vengê tepişteyan.''