3ê êlula 2022yî de şaristanê Meriwanî yê Rojhelatê Kurdîstanî de Şilêre Resûlî keyeyê xo de raştê hêrişê cînsîyî yê ciranê xo Goran Qadrîyî ameye. Şilêre (36) seba ke xo destê Goran Qadrîyo ke endamê îstîxbaratê Îranî yo ra bixelisna şamşînî ra eşt war û bi giranî birîndar bîye. Şilêra ke dadîya di domanan bîye 8ê êlule de nêweşxane de dinyaya xo bedilnaye.

Mergê aye ra dima cinîyê Rojhelatê Kurdîstanî vejîyayî waran, verê bînayanê mehkemeyan de înan waşt ke wa peygoşîya vera şîdetê serê cinîyan biqeda û cezaya tewr girane bêra dayene Goran Qadrîyî.

Endama Koordînasyonê Komelgehê Cinîyan ê Azadan a Kurdîstanî (KJAR) Çîmene Şine derheqê babete de cewab da persanê ANFyî.

Çîmene Şine da zanayene ke Rojhelatê Kurdîstanî û Îran de her ke cinîyî benê wayîrê hişmendîya azadîye rejîmê Îranî bi hawayêkê sîstematîkî hêrişanê sey tecawuzî visneno dewre. Şine vat: ''Ewro pêro cayanê dinya de hêrişê dişmenîya vera cinîyan serê esasê tecawuzî de yenê kerdene. Dewleta tirke ya faşîste û rejîmê Îranî yo kolonyalîste tecawuz yanî hêrişê cînsîyî sey metodêkê şerê taybetî û bi hawayêkê sîstematîkî vera cinîyan anê ca.

Vakur û Rojhelatê Kurdîstanî de hêrişê vera cinîyan sey polîtîkayanê şerê taybetî yenê caardene. No qirkerdişê cinîyan o. Rojhelat de endamê taybetî yê rejîmê Îranî û Vakurê Kurdîstanî de zî endamê artêşa tirke faîlê qirkerdişê cinîyan ê. Serebûtê Merîwanî îsbatê ney o. Xîretê tecawuzî yê vera Şilêre Resûlî vera pêro cinîyan ameyo kerdene. Şilêre mojna ke ruhê azadîye yê cinîyanê Kurdîstanî çend xurt o. A bîye raştîya cinîyanê serewedaritoxan û wijdanê komelî. Ewro malayê Îranî vanê 'Îran do pê destê cinîyan bêro rijnayene.' Nê hêrişî eqlê rejîmê Îranî eşkera kenê.

Sey KJARî ma do pê rêxistinkerdişê cinîyan cewabê nê hêrişî bidê. Rejîmê Îranî hol zaneno ke cinîyê Rojhelatê Kurdîstanî serkêşê têkoşînê azadîye yê coka bi taybetî hêrişê cinîyanê Rojhelatî keno. La ruho rûmetên, çêr û rind ê Şilêre do cinîyanê Rojhelatê Kurdîstanî û Îranî azad bikero.

Rejîmê Îranî hêzanê xo yê Pastaran û Besîcî vera cinîyan û domananê kênayan sey hacetêkê hêrişî şuxilneno. Ewro Merîwan de nê destê gemarinî şexsê cinîyan ê kurdan de wazenê biresê pêro cinîyan. Erkê pêro cinîyan ê kurdan û camêrdanê kurdan o ke nê destanê gemarinan bişiknê. Vera nê hêrişî bêvengmendiş yeno manaya tesdîqî.

Hêrişanê cînsîyan de ganî cinîyî têna nêrê verdayene. Ganî cinîyî vera nê hêrişan nêrazîbîyayîşanê xo hîna zaf bimojnê, têkoşînê xo bizêdînê. Şarê ma wayîrê nasnameyê rûmetênî yê Merîwane vejîya. Şarê ma seba ke polîtîkayanê şerê taybetî yê Îranî pûç bikero wa hîna hesas û hişmend bibo. Yeno waştene ke îradeyê cinîyan ê kurdan bêro çinkerdene. Wa cinîyê kurdî xo nêzdîyê polîs û leşkeranê dewletanê kolonyalîstan mekerê, înan de têkilîye nêvirazê. Cinîyê kurdî wa vera hêrişanê winasênan xopawitişî aver berê.

Eke cinîyê Rojhelatê Kurdîstanî û ê Îranî yew bibê, têkoşînê xo yew bikerê eşkenê hêrişanê rejîmê Îranî pûç bikerê. Bi taybetî cinîyî şarê ma yê Rojhelatê Kurdîstanî her warî de wa xopawitişî hem hetê hişmendî ra hem zî hetê fîzîkî ra aver berê. Ma venga pêro cinîyanê Rojhelatê Kurdîstanî û Îranî danê ke yew bibê, rêxistinîya xo aver berê. Çunke Îran û Rojhelatê Kurdîstanî do pê cinîyan azad bibê.''