Şirnex, Wan û Îstanbul de cinîyî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan waran de bîyî.

Qezaya Qilebanî ya Şirnexî de Têgêrayîşê Cinîyan ê Azadan (TJA) waşt ke warê Newroze de merasîmêk bikera la polîsan cinîyî asteng kerdî. Cinîyan bi çalakîya roniştişî şîdetê polîsan şermezar kerd. Dima seba eşkerayîye cinîyî derbazê warê Qilebanî bîyî. Wekîla HDPyî Nurane Îmîr, Rêxistinê HDPyî û Meclîsê Mayanê Haştîye zî tewrê eşkerayîye bîyî.

Aktîvîsta TJA Gulere Tunç eşkerayîye wende û da zanayene cinîyî rixmê astengî û hêrişan zî do têkoşînê xo rê dewam bikerê. Tunçe bale ante hêrişanê kîmyewîyan ser û pare kerd ke ganî cinîyî vera şerî vengê xo berz bikerê.

Wekîla HDPyî Nurane Îmîr qisey kerd û îfade kerd ke ganî cinîyî pê yewî û rêxistinîya xo verê hêrişan bigêrê.

Cinîyî dima şîye serê gorê Hemsereka Meclîsê Şarî yê Cizîre Asya Yuksel ser ke bodrumanê Cizîre de amebî qetilkerdene.

Wan de zî TJA bi şîarê 'Vera faşîzm û qirkerdişê cinîyan nika wext wextê azadîye yo' startê merasîmê 25ê Teşrîna Peyêne da. Merasîm dîyarîya Jîna Emînî ame kerdene. Qirseyî waşt ke taxa Memedelanî ya qezaya Qilebanî de startê 25ê Teşrîna Peyêne bido la leşkeran nêverda. Cinîyan vera leşkeran nêrazîbîyayîşê xo mojna û sloganê sey “Jin natirsin hesap dipirsin”, “Jîna Emînî rûmeta me ye” û “Jin jiyan azadî” vat.

Wekîla HDPyî ya Wanî Muazzeze Orhan vera astengîya polîsan eşkerayîye daye û pare kerd ke îqtîdar peynî de do birijîyo.

Îstanbul de serkêşîya TJA û Înîsîyatîfê Mayanê Haştîye de cinîyan Rêxistina HDPyî ya Kuçukçekmece de eşkerayîye daye. Polîsan nêverda ke cinîyî ver bi Gola Kuçukçekmece şorê. Cinîyan bînaya rêxistine de eşkerayîya xo wende.

Endama Înîsîyatîfê Mayanê Haştîye Bedîa Gokgoz eşkerayîye de qisey kerd vat: ''Ma waşt ke vera hêirşanê kîmyewîyan û şîdetê serê cinîyan rayraşîyayîşêkî bikerê.'' Gokgoze rayraşîyayîşê Dusseldorfî selam kerd.