Endama Merkezê Cigêrayîşî yê Jineolojî û akademîsyene-rojnamegere Nagîhane Akarsela ke Silêmanî de amebî qetilkerdene, şaristananê Ewropa de ameye yadkerdene. 

Kantonê  Bernî yê Swîsre de Komeleya Kulturê Kurdan a Bernî de Akarsele ameye yadkerdene. Bernameyê yadkerdişî de Vervatoxa Komeleya Kulturê Kurdan a Bernî Mîne Çetînkaya qisey kerd û pare kerd ke hişmendîya serdestîya camêrdan Akarsele kişta. Bername de sîyasetmedar Burhan Karakoçî zî vist vîrî ke Sersefîrê Tirkîya îtîraf kerdo ke înan Akarsele kişta. Qiseykerdişan ra dima findî ameyî tavistene.

Şaristanê Frankfurtî yê Almanya de zî vengdayîşê TJK-E ser o cinîyan meydanê tewr qerebalixî de findî tavistî û çalakîya protestoyî kerde.  Çalakîye bi berzkerdişê sloganê 'Jin, Jiyan, Azadî' û 'Şehîdî nêmirenî' qedîyaye.

Paytextê Almanya de Berlin de Meclîsê Cinîyan ê Destane û femînîstan qetilkerdişê Akarsele protesto kerd. Cinîyan findî tavistî û deqayêk rêz girewt. 

Şaristanê Bremenî yê Almanya de Merkezê Kulturê Kurdan de Akarsele ameye yadkerdene. Bername de findî ameyî tavistene. Bername de seba Akarsele, Hevrîne Xelef û Jîna Emînî deqayêk rêz ame girewtene. 

Bajaranê St Gallen, Zurih, Basel û Luzernî yê Swîsre de zî serkêşîya meclîsanê cinîyan de Nagîhane Akarsel ameye yadkerdene.

Çalakîyan de semedê Akarsele vilawekî ameyî wendene, fîndî ameyî tavistene û sloganê “Jin jiyan azadî” ameyî eştene.

Paytexê Fransa Paris de zî endamanê TJK-Fyî verê Buroyê Enformasyonî yê Kurdîstanî yo ke tede qirkerdişê Parisî ame kerdene de fîndî ameyî tavistene. Cinîyan dormeyê fotografanê  Nagîhane Akarsel, Sakîne Cansiz, Fîdane Dogan, Leyla Şaylemez de vilîkî nayî ro û deyîra Zîlane vate.