Vervatoxa Rêxistina Sîwanî ya Meclîsanê Cinîyan ê Êzidîyan (SMJÊ) Nûrê Alkiş manaya 4ê Nîsane rojbîyayîşê Rayberê Şarê Kurdî Abdullah Ocalanî ser o qisey kerd.

Alkişe da zanayene ke xêrê felsefeya Rayberê Şarê Kurdî ra cinîyan ê kurdan xo şinasnayo. Alkişe vat: ''Ma sey cinîyan ê êzidîyan fikranê Rayber Apoyî de xo dî û a roje ra nata ma cuya xo awan kenê. Şarê êzidîyan heta nika maruzê xeylêk qirkerdişan mend. Êzidîyan Saddamî ra ant, dima zî PDKyî ra ant. Hêrişanê DAÎŞî de PDKyî êzidîyî war verdayî. La paradîgmaya Rayber Apoyî serkêşîya xoverdayîşê êzidîyan kerd û êzidîyî qirkerdişî ra xelisnayî.

Ewro Şingal xêrê paradîgmaya Rayberê Şarê Kurdî Abdullah Ocalanî ra êzidîyan meclîs, îdareyê xo yo xoser, meclîsê xo yê leşkerî, YJŞ û YBŞ awan kerdî. 4ê Nîsane coka seba cinîyan ê êzidîyan zaf girîng o. Ma eşkenê na roje sey roja estbîyayîşê xo pênase bikerê. Naye ra ma her serre bi girseyan 4ê Nîsane fîraz kenê. Azadîya Rayber Apoyî azadîya cinîyan ê êzidîyan a.''