Endama Meclîsê Cinîyan ê HDPyî Hasrete Alp ANFyî rê têkoşînê cinîyan û hêrişanê vera cinîyan ser o qisey kerd.

Alpe da zanayene ke îqtîdarê AKP-MHPyî wazeno cinîya 'meqbûle' biaferno û bi nê hawayî muxalefetê xurtî asteng keno. Alpe vat: ''Ewro pêro rêxistinê cinîyan hedefê îqtîdarî de yê. Bi taybetî Têgêrayîşê Cinîyan ê Kurdan o ke dinya de rayberîya cinîyan keno yeno hedefkerdene. Ma vera nê çîyan, wedaritişê Peymana Îstanbulî, binpaykerdişan û hêrişan xo ver danê. Serdestîya camêrde-dewlete, hîşmendîya camêrdîye şîdet sey çareserîye qebul kenê. Na hîşmendîye hetê xo de şîdetê vera cinîyan ana.''

Alpe pare kerd ke mabênê zêdîyayîşê şîdetî û polîtîkaya bêcezaverdişî de eleqeyêk esto. Alpe vat: ''Hêriş û cînayetê vera cinîyan şexsî nîyê. Têkoşîno hempar û rêxistinkerde eşkeno verê na hîşmendîya ke komelî rê tesîr kena  bigêro. Têgêrayîşê Cinîyan ê Kurdan hetê dewlete ra bi hawayêkê sîstematîkî yeno hedefkerdene. Semedo ke cinîyê kurdî wayîrê çift nasnameyî (cinîye û kurde) yê dewlete vana qey şexsê ma de eşkena mesaj bida pêro cinîyan. La no kerdiş nêresa armancê xo. Îqtîdar pê tecrîd, destbendkerdiş, tepiştişî keno ke cinîyan bênefes verdo.''

Alpe peynîya qiseykerdişê xo de îfade kerd ke cinîyî hêzê xo rêxistinîye û paştdayîşî ra gênê û wina vat: ''Ma venga pêro cinîyan danê ke vera qirkerdişê cinîyan vajê 'vinde', sere de Peymana Îstanbulî wayîrê pêro heqanê xo vejîyê û têkoşînê têdûştî, heq, demokrasî û haştîye pîl bikerê.''