Amed de serkêşîya DBP û DEM Partî de bi şîarê ''Seba haştîye azadîye'' mîtîng ame kerdene. Pîya bi temsîlkaranê rêxistinanê sîyasî û komelê sîvîlî bi des hezaran hemwelatîyî bajaranê cîya cîyayan ê Kurdîstanî ra tewrê mîtîngî bîyî.

Hemsereka Pêroyî ya DBPyî Çîgdeme Kiliçgun Uçar, Hemserekê Pêroyî yê DEM Partî Tuncer Bakirhan, aktîvîstaTJA  Çaglare Demirel û dayîkêka haştîye sey qiseykerdoxan tewrê mîtîngî bîyî. Hemserekê Pêroyî yê DBPyî Keskin Bakirhan, wekîlê DEM Partî û CHPyî û hemşaredarê bajar û qezayan tewrê mîtîngî bîyî.

Dezgehê ziwanê kurdkî û Dayîkê Haştîye ke sey kortejêkê cîyayî dekewtê warê mîtîngî  bi wesîleya 21ê Sibate Roja Ziwanê Dayîke ya Dinya  pê pankartê “Bila zimane Kurdî, bibe zimanê fermî û perwerdehiyê” ve “Her dem Kurdkî her ca de Kurdkî” rayra şîyî. Qirseyo ke bi erbane û deyîranê kurdkî rayra şi slogana “Be ziman jiyan nabe” vate.

Hetê bînî ra Wendekarê unîversîte pê pankartê “Heta Serok azad nebe, aşitî şaşiti ye” tewrê rayraşîyayîşî bîyî. Ciwanan rixmê heme astangkerdişê polîsan pankartê xo kirişt warê mîtîngî.

Bi des hezaran kesan ke verê qiseykerdişan govende girewte sloganê sey “Be serok jiyan nabe” û “Jin, jiyan, azadî” vatî.

Verî Hemserekê DEM Partî yê Amedî Abbas Şahînî qisey kerd û vat: ''Wa no meydan bibo meydanê haştîye. Hinî wextê haştîye ameyo.''

Çaglare Demirel zî ard ziwan ke TJA do semedê haştîye xover bido û vat: ''No şaro ke tîya ameyo têhet haştîye û azadîye wazeno.  Muxatabê azadîye û haştîye bewlî yo. Rayberê Şarê Kurdî Abdullah Ocalanî wa bibo azad.''

Dayîkanê Haştîye ra Havva Rabia Kiran zî vist vîrî ke şarê kurdî wayûbiratîye û yewîye wazeno veng da ke wa her kes semedê haştîye wirzo payan ser.

Çigdeme Kiliçgun Uçar zî vat: ''15ê sibate de heqê hêvî bîyarê caardene, ma pêro pîya haştîya ke şarî pawenê înşa bikerê.''

Tuncer Bakirhanî zî nê vatî: ''Şima nêeşkenê zerrîya bi mîlyonan bikerî zereyê 12 metrekareyan. Ocalan zerrîya bi mîlyonan kesan o. Hêvîya ci yo. Heta ke hêvîya bi mîlyonan hucreyêk de binê îzolasyonî de bêro tepiştene, ma samîmîyetê şima rê bawer nêkenê. 12 metrekareyan de muzakere nêbeno. Ganî Ocalan şarê Amedî reyde bêro têhet. Ganî cade reformî bêrê kerdene ke Ocalan  bi komelî  bêro têhet.''