Wendekara Fakulteya Weyekerdişê Domanan a Zanîngehê Wanî Rojîne Kabaîş (21) 27ê êlule de wargehê wendekaran ra vejîyabî û dima tira xeberêke nêamebî girewtene. Cenazaya Rojîne vizêr qeraxê Gola Wanî de amebî dîyene û Amed de tezîyeya ci ameye ronayene.

Amed de cinîyî Parka Goletli de ameyî têhet û ver bi Şînxaneyê Abdurrahman Ençî yê Rêzanî rayraşîyayîşo bêveng kerd.  Rêxistinê cinîyan, hemşaredarî, Vervatoxa Meclîsê Cinîyan ê DEM Partî Halide Turkoglu, sîyasetmedare Gultane Kişanak û zî tede xeylêk cinîyî tewrê rayraşîyayîşî bîyî. Cinîyan fotografê Rojîne Kabaiş kerd sîneyê xo ya û pankartê ''kiştişê cinîyan polîtîk û îdeolojîk o'' akerd.

Badê rayraşîyayîşî verê şînxaneyî de endama Komeleya Cinîyan a Rosa Berfîne Poltat qisey kerd. Polate vat ma şexsê Rojîne de semedê heme cinîyan ke yenê vîndîkerdene, qetilkerdene û bi hewayêkê şikdarî yenê vînayene ê tîya de yê. Berfîne Polat vat: ''Heme heqê ma yê ke ma fînayî dest binê nameyê 'refom' û 'newebîyayîş' de destê m ara yenê girewtene. Ma vînenê ke poltîkayê bêcezakerdişî senî verê qetilkerdişî akenê. Teberê têkoşînî de yewna rayîrê ma çîn o. Ma do kuçeyan de têkoşînê xo bidomnê.''

Hemşaredara Bajarê Pîlî yê Wanî Neslihane Şedal zî zî vat: ''Ma do kiştoxanê Narîne zî Rojîne zî bivînê. Bi hewayêkê polîtîkî derheqê cuyeya ma de qerar genê, gama ke ma vera nê vejîyenê qetil kenê, tecrîd kenê, erzenê zîndanan. Bi hezaran cinîyî paştî danê keyeyê Rojîne. Ma tîya de soz danê. Heta çareserkerdişê na hedîse têkoşînê ma do dewam bikero.''