Cinîyê ke 5ê nîsane de operasyonê qirkerdişê sîyasîyî yê Amedî de ameyî destbendkerene înan ra di cinîyê bînî ameyî tepiştene. Hûmara tepişteyan bîye 8.

5 cinîyê ke ewro vejîyayî mehkeme înan ra Hemşaredara Çinarî Necla Tamrîş û  Hemsereka DBPyî ya Amedî Sevale Gulmez bi îdîaya ''endamîya rêxistine'' ameyî tepiştene. Rukene Bekalp, Emîne Kaya û Besîle Narin bi tedbîrê kontrolê edlîyî ameyî veradayene.

Aktîvîsta TJA Zelale Bîlgîn, Endamê Meclîsê Şaredarîya Bajarê Pîlî yê Amedî Bahare Karakaş Ulug û Rabîa Tekas ke wextê nezaretê înan ame dergkerdene muameleyê înan ê Mudirîya Asayîşî yê Amedî hema dewam kenê.
Cinîyan ra Zeynep Aykat zî vizêr saetanê şanî de hetê dozgerîye ra ameyebî veradayene.

18 cinîyî vizêr vejîyaybî mehkeme, înan ra 6 cinîyî ameybî tepiştene, 9ê înan bi şertê kontrolê edlîyî ameybî veradayene, cinîyêke rê cezaya hepsê keyeyî ameyebî dayene.