Platformê Cinîyan ê Amedî yê Dîcle û Torra Têkoşînê Vera Şîdetî ya Amedî startê çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan da û cinîyan ê tepişteyan rê kartî şawitî.

Cinîyan verê bînaya PTTyî ya Rêzanî de pankarta 'jin, jiyan, azadî' akerde û sloganî vatî. Wekîla HDPyî ya Amedî Remzîye Tosun zî tewra çalakîye bîye. Avûkate Îreme Yildiz dima eşkerayîya hempare wende.

Yildize bale ante xoverdayîşê cinîyan ê Îran û Rojhelatê Kurdîstanî ser û da zanayene ke vera şîdetî cinîyî her ca de payan ser de yê. Yildize vist vîrî ke şaristananê sey Colemêrg, Şirnex û Dêrsimî de vera cinîyan ê kurdan polîtîkayê şerê taybetî yenê kerdene. Îreme îfade kerd ke cinîyê sey Sereka TTByî Şebneme Korur Fîncanci, avûkate Aryane Turan û Endama Merkezê Cigêrayîşî Nagîhane Akarsel raştê teda, hêriş û zorbazîya camêrdan û dewlete yenê.  Îreme Yildiz pare kerd ke ê do vera nê hêrişan bêveng nêmanê û peynîya eşkerayîye de zî Jîna Emînî yad kerde.

Dima cinîyan zîndananê cîya-cîyayan rê kartê bi nuşteyê 'jin, jiyan, azadî' seba cinîyan ê tepişteyan şawitî.