Meclîsê Cinîyan ê HDPyî Amed de bi şîarê ''cinîyî vera şer,tecrîd û nîjadperestîye haştîye pawenê'' têhetameyîşê cinîyan organîze kerd. Cinîyê ke Cafeyê Taş Mahalî yê Sûrî de ameyî têhet mesajê pîlkerdişê têkoşînî dayî.

HDP, TJA, OHD, MED-DER, Meclîsê Dayîkanê Haştîye û Komeleya Cinîyan a Roza ra xelêk cinîyî tewrê kombîyayîşî bîyî. Qiseykerdişê akerdişê tehêtameyî Serekwekîla Koma HDPyî Merale Daniş Beştaş kerd.  Beşdaşe vat ê têna semedê cinîyan ê kurdan nê semedê heme cinîyan têkoşîn kenê.

Beştaşe nê vatî: ''Xoverdayîşê cinîyan ê kurdan hinî bîyo mîyanneteweyî. Cinîyan ke semedê nayî bedelî û ganê xo dayo ez înan selam kena.  Zext, asîmîlasyon, înkar û şîdet her roje zêdîyenê. Abdullah Ocalan 22 serrî yo bi metodê taybetî Zîndanê Îmarali de yeno tepiştene. Têkoşînê cinîyan de babeta tewr muhîme xoverdayîşê vera tecrîdî yo.  Heta ke tecrîd medarîyo we haştîye nîna û problemî çareser nêbenê. Abdullah Ocalan heme şaran temsîl keno. Pê çareserkerdişê meseleya kurdî problemê bînî zî eşkenê bêrê çareserkerdene. Ma nînan tecrubeyanê verênan ra zanê.  Abdullah Ocalanî vat o eşkeno hewteyêk de mesela çareser bikero. Coka ganî ma têkoşînê vera tecrîdî pîlêr bikerê. Ma kewtî nê rayîr ke têkoşînê xo pê haştîye tacîdar bikerê.

Zîndan de bi mengan o grevê vêşanîye yeno domnayene. Ganî ma teber de têkoşîn bikerê û meverdê tepişteyî barê giranî bîgirê xo ser. Vervejîyayîşê tecrîdî veravejîyayîşê şerî, qirkerdişê cinîyan, qirkerdişê xoza yo. Vervejîyayîşê tecrîdî wayîrvejîyayîşê haştîye û pawitişê komelî yo.

Dişmenîya vera kurdan ra bîyî gej nêzanê çi bikerê. Sere eşto kurdkî ser. Her roje vera ziwanê dayîke yê kurdan yew hêriş yeno kerdene. Xora hêrişê nîjadperestîye yê vera kurdan her roje zêdîyene. Kurdî rîyê nasnameyê xo ra yenê qetilkerdene. Nê pêro rîyê polîtîkaya hêrişkare ya hukmatî ya  vera kurdan ra yenê qewimîyayene. Ma wazenê seyyewbînî bi heta ke seyyewbînîye mebo wayûbiratîye nêbena.''

Beştaşe semedê cinîyan ê afganan zî mesajê paştîdayîşî da û  bale ante ser ke şarî pê hêzê xo eşkenê azad bibe. Baştaşe vat: ''Zerîya Rojhilatê Mîyanênenî de cinîyê ke DAÎŞî rê da vînîkerdene estê. Ê cinîyan senî têkoşîn yeno kerdene ramojna heme dinya. Tirkîya wazenê Talîban reyde bibo mutefîk la ma do testûrê nayî medê. Ma cinîyî vera tecrîd, qirkerdişê cinîyan, asîmîlasyon û nîjadperestîye do têkoşîn bikerê.''

Badê qiseykerdişê Beştaşe grûba muzîkî ya Komela Kulturî ya Dicle Firatî deyîrî vatî. Têhetameyî pê goştarîkerdişê muzîkî qedîya.