Îdarekaranê KJK’yî ra Koçerîn Amed a ke ANF’yî rê qisey kerd,derheqê qeyûman û muhîmîya sîstemê hemserkîye ser  nê vatî:

''Îqtîdaro faşîst o ke peynîya ci bîya nêzdî hêrişê şarê Kurdî, hêzanê demokrasî û cinîyan keno û vera nînan polîtîkaya qirkerdişî bica ano. Xespkerdişê hîrê şaredarîyanê bajaranê pîlan ê HDP’yî zî na çerçewe de yo. Îqtîdar vera xoverdayîş û destkewteyanê Kurdan her roje hêrişê xo zêdîneno. Amed zerrîya Kurdistanî ya, Mêrdîn qeleya welatperwerîye ya, Wan damara xoverdayîşê biheybet a Kurdistanî ya. Ê zanê ke heta Amedî teslîm megê nêeşkenê ver bi Rojawan şirê, heta ke qelaya Mêrdînî merijnê nêeşkenê destkewteyanê şarê Kurdî tasfîye bikerê û heta ke damara Wanî meqerfinê nêeşkenê mucadeleyî bidê vindarneye. Coka nê cayan ra test pê kerd. Vera nê hêrişan xoverdayîş heqê ma yo esasî yo. Xora sey Têgêrayîşê Cinîyan ê Kurdan berpirsîyarîya ma zî gird a.Hêzo gird ê nê mucadeleyî ma cînî yê. Na çarçewe de heme cinîyî ganî wayîrê destkewteyan, tarîx, herre û îradeyê xo bivejîyê.

Karekterê îqtîdarî camêrd o. Cinîyî meclîsan de tayî.Ma sey Têgêrayîşê Cinîyan ê Kurdan wareyê sîyasîyî de tena nêyî. Ma wayîrê tarîxê zaf xorî yê û ma wayîrê nê tarîxî vejîyenê. Protestoyanê Amedî de cinîyî vanê,‘ hemserekîye xêza ma ya mor a‘ no vatişêko ca de yo.Beno ke xeylî çîyan ra dewrkî çew eşkeno peyser agêro la sîstemê hemserkîye ra peyser game nêna aştene. Semedê ma sîyaset îqtîdar nê cayê azadbîyayîşî yo. Coka sîyaset de estbîyayîşê ma, semedê ma zaf muhîm o û cira nêno ravêtene. Goreyê partîyanê klasîkan bitaybetî zî AKP-MHP’yî cayê cinîyan keye yo. Goreyê înan gureyê cinîyan qijardiş û miqatbîyayîşê înan o. Nêzdîbîyayîşê înan ê vera cinîyan cînsî yo. Sîstemê hemserekîye wareyê seypêyîye yê cinî-camêrdî yo.Cuya cinîya bimana dinya zî keno bimana. Cimatê Kurdan de cinî; cuye, welatperwerîye, herre, heskerdiş, kede, serewedartiş, xoverdayîş, milê çewt nêkerdiş û îtaatnêkerdiş a. Faşîzm bi sîtemê xo yê şerî yê taybetî hêrişê cinîyan ê Kurdan keno. Hêrişî senî benê wa bibê  raştîya cinîyan ke Kurdistan de bi ruhê xoverdayîşê Sakîne Cansizan, Sema Yuceyan, Berîtanan û Delalan ameyo mîrazkadene kes nêeşkeno vernîya ci bigêro. Cinîyê Kurdê ke bianor xeta Rayberîye de xover danê, xeta bikerê zî ercanê xo ra nêqerfîyenê û do sey tim mucadeleyê xo gird bikerê.‘‘