Çarçewa 25ê Teşrîna Peyêne Roja Tekoşînê Mîyanneteweyî yê Vera Şîdetê Serê Cinîyan de zaf çalakîyî û aktîvîteyî yenê kerdene. Amedî de Komeleya Cinîyan a Rosa, Torra Şîdetî, Meclîsê Cinîyan ê HDPyî û zaf rêxistinanê cinîyan bernameyê xo yê 25ê teşrîna peyêne qetî kerdî. Gore bernameyan 22ê teşrîna peyêne de raporê şîdetî yê 4 mengan o ke pêro Tirkîya ser o yo, bêro parekerdene. 23ê teşrîna peyêne de tewiranê şîdetî ser o komxebatêke bêra serûberkerdene. 25ê teşrîna peyêne de zî bi beşdarîya pêro rêxistinanê cinîyan rayîrşîyayîşê şewe do bêro kerdene.

 '76 cinîyî ameyî qetilkerdene'

Endama sazkerdoxe ya Komeleya Cinîyan ê Rosa Suzane Îşbîlen derheqê amadekarîyanê 25ê teşrîna peyêne de qisey kerd û vist vîrî ke têna menga êlule de 40 cinîyî, menga teşrîna verêne de zî 36 cinîyî ameyî qetilkerdene û vat ke cinîyî eşkenê bi rêxistinbîyayîşî vera şîdet û qirkerdişan vinderê. Îşbîlene vat cinîyî do 25ê teşrîna peyêne de vera şîdetî vajê 'ney'. Îşbîlene bale ante ser ke şîdet çarenusê cinîyan nîyo û sey Komeleya Cinîyan a Rosa armancê înan no yo ke cinîyan reyde  paştdayîşêkê pêtî pêşkêş bikê. Îşbîlene îfade kerd ke îqtîdarê AKPyî de qetilkerdişê cinîyan bi zêde û AKP bi vatiş û kerdişanê xo cinîyan sey hedef mojneno.  Îşbîlene ard ziwan ke seba ke şîdetê vera cinîyan bêceza maneno şîdet beno zêde. îşbîlene peynî de vat ke îqtîdar xîret keno ke Peymana Îstanbulî ca nêaro la ê sey cinîyan heqanê xo ra do fek vera nêdê.