Endama Meclîsê Cinîyan ê DBPyî Elîfe Turan pare kerd ke vera polîtîkayanê şerê taybetî înan 39 atolyeyî viraştê, bi hezar û 500 cinîyî nînan de kom bîyê û bale ante girîngîya pîlkerdişê têkoşînê vera şerê taybetî ser.
Têgêrayîşê Cinîyan ê Azadan (TJA) û Meclîsê Cinîyan ê DBPyî vera polîtîkayanê şerê taybetî pîya atolyeyan virazenê.
Endama Meclîsê Cinîyan ê DBPyî Elîfe Turan ANFyî rê qalê nê atolyeyan kerd.
Elîfe Turan da zanayene ke pêro dinya de şer qewimîyeno û twr zaf cinîyî binê tesîrê nê şeran de manenê. Elîfe Turan bale ante şerê taybetî yê vera cinîyan ser û vat: ''Cinîyî bêîrade yenê verdayene, raştê asîmîlasyonî, koçberkerdiş, xizanîye, ferzkerdişê narkotîk, tecawuz, tacîz û şîdetî yenê. Komelê bêrêxistinkerdeyî vera hêrişan bêpawitiş manenê. Coka ma sey Meclîsê Cinîyan ê DBPyî bire daye ke atolyeyanê serê şerê taybetî awan bikerê. Heta nika Êlih, Sêrt, Şirnex, Erzîrom, Amed, Mêrdîn, Çewlîf û Riha de ma 39 atolyeyî kerdî, nînan de bi hezar û 500 cinîyî û cinîyê ciwanî ardî yewca.
Atolyeyan de ma embazanê xo yê cinîyan de sobhetî kerdî û polîtîkayanê şerê taybetî ser o nîqaşî kerdî. Nê nîqaşan de nê çî tewr zaf bala ma ante; hayîya cinîyan bi meseleyan est a la babeta têkoşînî de pawitişê nînan est o. Dewlete armanc kena ke komelî erjanê ci ra dûrî bifîna û komelbîyayîşî biqedîna. Nê esasî ser o seba newe ra awankerdişê komelbîyayîşî, seba komelê demokratîk, exlaqî û polîtîkî destê ma ra çi bêro ma do bikerê. Bi felsefeya 'Jin, Jiyan, Azadî' ma do vera qirkerdişê komelî têkoşîn bikerê û bi perwerdeyî rêxistinîya xo xurtêr bikerê.''
