Hemsereka Şubeyê Amedî yê Komeleya Huqûqnasan a Seba Azadîye (OHD) Avûkate Ozume Vurgun 'muhakemebîyayîşê' cinîyan ANFyî rê ercna.

Avûkate Vurgun pare kerd ke betalbîyayîşê Peymana Îstanbulî ra nata vera cinîyan stratejîya taybete yena kerdene û na stratejî bi temamî dişmenî û çinkerdişî ser a.

Vurgune îfade kerd ke vera cinîyan ê kurdan huqûqêko cîya yê dişmenîye esto û vat: ''Bêguman cinîyê tirkî zî raştê hêrişî yenê la vera cinîyan ê kurdan polîtîkaya şerê taybetî yena caardene. Merdim eşkeno na polîtîka dezgehê hukmî de zî bivîno. Mîsal aktîvîstanê TJA Zelale Bîlgîn rê cezaya zîndanî ya 10 serran, Ayşe Gokkan rê cezaya zîndanî ya 30 serran dîyaye. No şero taybet warê hukmî de zî bi eqlê camêrdan yeno kerdene. No şero taybet serranê 90an ra nata dewam keno.''

Avûkate Ozume Vurgun da zanayene ke polîtîkayê şerê taybetî seba çinkerdişê têkoşîn û hişmendîya cinîyan şexsê Musa Orhan û Onur Gencerî de yenê kerdene. Vurgune vat: ''Nê kerdoxî wezîfedarê umûmî yê. Bi unîformayanê xo merdimî kiştî. Serranê 90an ra nata tedaya unîformakerdeyan dewam kena. Cinîyî seba ke vera ney têkoşîn kenê benê hedefê hêrişê mekanîzmayanê hukmî. Coka ganî ma statuyê qanûnê bingeyî yê cinîyan ê kurdan nîqaş bikerê. Bingeyê pêro hêrişanê vera cinîyan ê kurdan de armancê tengkerdiş û kiştişî esto.

Xoverdayîş û şorişê cinîyan hertim xurt o. Bi qirkerdiş û zorbazîye ê do pê ma nêeşkê. Ma do qetî destkewteyanê xo ra fek vera medê.''