Hemsereka Meclîsê Keyeyanê Şehîdan ê Kantonê Kobanê Ayşe Efendî bi wesîleya serrgêra Şorişê Rojawanî ANFyî rê qisey kerd.

Ayşe Efenfî 19ê Temmuze sey mîrasê ruhê xoverdayîşî yê 14ê Temmuze hesibna û vat: ''Nê 10 serran de têkoşîno xurt bi. Qirkerdişî qewimîyayî, barkerdişî bîyî, ma raştê ambargoyan ameyî.  Pîya bi nînan ma zaf çîyî fînayî dest. QSD, YPG, YPJ û HPC ameyî ronayene. Binê serbanê Îdareyê Xoserî de komun û meclîsî ameyî ronayene. Rojawan de heme şaran bi nasnameyê xo pîya dest pê ciwîyayîşê kerd. Her şar bi ziwan, dîn û kulturê xo têkoşîn de ca girewt û wina qeyde hêzê pawitşî ame ronayene. Ma sey dayîkanê şehîdan her dîn û ziwan ra ameyî têhet û bîyî yew. Ma wina qeyde payra mendî û têkoşîn kerd.

Wexdê destpêkerdişê Şorişê Rojawanî de Mexmûrî ra yew mamoste ders dayêne çend qicanê ma. O wext tay partîyê sîyasîyî pê ma wîyayî, kerdişê ma wirdî dî û vat şima wina nêeşkenê ser bikewê. Ma soz dabi şehîdanê 19ê Temmuze û ma ewro sozê ard ca. Bawerîya ke pê çar qican dest pêkerd ewro dibistanî ra heta unîversîte bi hezaran wendekaran dana wendene. Mîyanê nê 10 serran de me hem sey cografya hem sey sîstemî bîyî hîra. Na cografya de her dîn, ziwan û kultur rehat ciwîyenê.''

Ayşe Efendî bale ante tehdît û hêrişanê vera Rojawanî ser û vat: ''Şer hema dewam keno. Hema zî destê îxanetî keyeyê şehîdan û ercanê şorişî rê derg beno. Ma sey dayîkanê şehîdan serê tabûtanê qicanê xo de soz dayo, ma do şorişî bipawê. Semedê pawitişê destkewteyan û wayîrvejîyayîşê mîrasê şehîdan ma do xo bipawê û têkoşînê xo xurtêr bikerê.''

Ayşe Efendî projeyê azadîye yê cinîyan ê Rayberê Şarê Kurdî Abdullah Ocalanî sey newe ra bîyayîşî hesibna û vat: ''Sîstemê hemserekîye, komun û meclîsî ameyî raameyene. Dîplomasî ra heta ekonomî heme komîteyanê komelkî de cinîyan ca girewt. Heme çarçeweya sîstemê cinîyan de ameyî raameyene. Nê şorişî de cinîyan dahîna zaf kede daye, têkoşîn kerd û cinîyan mîyanê nê şorişî de xo sarisna. Cinîyan 19ê Temmuze de tifing na xo doş, dewe, mehale û bajarê xo nayî ro. O wext qet çîyêkê ma çînêbi. Çeke heta wer çînêbi. Nê 10 serran de cinîyan vera çeteyan û dewleta tirke şer kerd. Cinîyan qet peyde gamê nêeşte. Ma bedelê pîlî dayî. Barê ma giran bi.  Proseso ke binê nameyê Şorişê Sûrîye de dest pêkerd de ma Şorişê Kurdan, Şorişê Rojawanî û Şorişê Cinîyan kerd. Cinîyê kurdan pê YPJyî heme dinya de ameyî sarisnayene. Nê pêro mîrasê têkoşînê 50 serran o.  Keda Rayber Apoyî  û bi hezaran şehîdan a. Ma wina çînbîyayîşî ra estbîyayîş aferna.''