Endama Koordînasyonê Partîya Azadîya Cinîyan a Kurdîstanî (PAJK) Aytene Dêrsim ANFyî rê qisey kerd û bale ante girîngîya paştdayîşê cinîyan ê vera faşîzmî ser.

Qiseykerdişê Aytene Dêrsim ra beşêk wina yo:

''Sey Konferansê Cinîyan ê Rojhelatê Mîyanênî rêxistinî û kombîyayîşê cinîyan zaf girîng ê. Ewropa ra heta Rojhelatê Mîyanênî têkoşînêko girîng ê cinîyan esto labelê no têkoşîn parçekerde yo. Ganî cinîyî yew bibê û xo rêxistin bikerê. Cinîyê kurdî vera faşîzmî wayîrê tecrubeyî yê. Têgêrayîşê ma yê azadîya cinîyan Kurdîstan de û pêro dinya de tim mîyanê karê rêxistinî de yo. Konferans bire dîyaye ke têkoşînê cinîyan bêro mendekerdene û paştdayîşê cinîyan bêro xurtkerdene. No girîng o.

Erdogan pê hêrişanê vera Başûr, Rojawan û Vakurê Kurdîstanî qirkerdişê kurdan armanc keno. 40 serrî yo ê hê vanê 'ma do şima biqedînê.' La hînî faşîzmî zî emrê xo temam kerdo. Tirkîya Şingal de karanê nêmcetan ê DAÎŞî kena. Şingal eşkeno pê îradeyê xo ameyoxê xo, îdareyê xo biweçîno. Avaşîn, Metîna û Zap de rixmê hende teknîk, kîmyasalî zî rayîr nêdîyeno îşxalî. Pê nê îradeyî azadîye do bêra destvistene. Vera faşîzmî eke şar xo rêxistin bikero do ser bikewo.

PDK Tirkîya û hêzanê serdestan reyde têgêreno. Hem sozê 'Ma do gonîya way û birayanê xo merijnê' danê hem zî rayîr danê ke îşxalkerî debikewê erdê şarî. Ti îstîxbarat danî rejîmê Erdoganî, ti destûr danê ke xoza bêra talankerdene, erdê Başûrî de qereqolî virazîyê, ti kewenî mabênê gerîlayan û dişmenî. No rijnîyîşê gonîye nîyo? Êyê ke kewtî Garê, Avaşîn, Metîna siba do bikewê Silêmanî û Hewlêr zî. Ma semedê yewîya neteweyî goş nêdanê rêxistinanê winasênan, ma goş danê cinîyanê Başûrî. Eke cinîyî yew bibê eşkenê kokê nê şerê gemarinî û bêbextîye bîyarê.

Nê esasî ser o ez xoverdayîşê şarê Başûr, cinîyanê Başûrî, ciwananê Başûrî selam kena. No têkoşîn ganî bêrı pîlkerdene. Cinîyê Kurdîstanî wayîrê tevrube yê. Têna ganî semedê ney bira xo bidê û rêxistinîya xo mende bikerê. Nameyê PAJKî ser o ma her wextî ra zêdêr amade yê û ma do tim bi nê hawayî têkoşîn bikerê.''