Vervatoxa Meclîsê Cinîyan ê HDPyî Ayşe Acar Başaran bînaya Amedî ya DBPyî de derheqê rojdemî de qisey kerd.

Qiseykerdişê Başarane ra tay noqtayê girîngî wina yê:

''2022 seba cinîyan hem serra têkoşînî hem zî serra zehmetîyan bîye. 2022 de bi şîarê 'Jin, Jiyan, Azadî' qetilkerdişê Jîna Emînî ra dima Rojhelatê Kurdîstanî û Îran de serewedaritişê cinîyan dest pêkerd. 2022 de Tirkîya û Vakurê Kurdîstanî de dişmenîya îqtîdarê AKP-MHPyî ya vera cinîyan dewam kerd û bi fermanêkî Peymana Îstanbulî ameye betalkerdene. Welat de polîtîkayanê bêcezaverdişî ra şîdetê vera cinîyan zêdîya û 2022 de tewr yau 310 cinî hetê camêrdan ra ameyî qetilkerdene. Cinîyî 25ê Teşrîna Peyêne de vera şîdetî vejîyayî meydanan û reyna raştê şîdetî ameyî. La rixmê nê hêriş, operasyon û destbendkerdişan zî cinîyî payan ser de yê.

2022 de embaza ma Semra Guzel pê dafika Wezîrê Karanê Zereyî yo ke serçeteyê sûcan o, ameye tepiştene. Semra Guzel ameye hedefkerdene û wekîlîya ci zî ameye xespkerdene. Reyna Dewaya Kobanê zî sey yew dafike vera partîya ma dewam kena. Reyna rojanê peyênan de bi operasyonan îdarekar û hemserekê DBPyî ameyî tepiştene. Îqtîdarî 2022 de partîya ma kerde hedef û netîceya nê hedefkerdişan de bînaya partîya ma ya Îzmîrî de embaza ma Denîze Poyraz ameye qetilkerdene. Hêzê peyê nê qirkerdişî zî nêameyî roşnîkerdene. Heta ke kiştoxê esasî yê embaze Denîze bêrê muhakemekerdene têkoşînê ma do dewam bikerê.

2022 de verî Silêmanî de embaza ma Nagîhane Akarsel ameye qetilkerdene. Dima 23yê kanûne de hêrişê vera Merkezê Kulturê Kurdan ê Ahmet Kayayî de 3 kurdî qetil bîyî. Verî zî Paris de Sakîne Cansiz, Leyla Şayleme û Fîdane Dogan ameybî qetilkerdene. Ma sey ê çaxî venga hukmatê Fransa danê ke wa faîlanê raştikênan muhakeme bikero. Ma do vera nê hêrişan 2023 de sindoqan de cewabê xo bidê. Hêrişî do nêeşkê têkoşînê cinîyan asteng bikerê.

2022 de goreyê raporan 440 hezar domanî raştê îstîsmarê cînsîyî ameyî. No îqtîdar verê hêrişanê cînsîyan ê serê cinî û domanan nêgêno. Ma venga îqtîdarî danê ke eke şima nêeşkenê erkê xo bikerê, ê kursîyan ra wurzê we.

Tecrîdê girankerdeyî ra bi mengan o ma nêeşkenê Birêz Ocalanî ra xeberêke bigêrê. Embazê ma vera tecrîdî hê verê Wezîrîya Edaletî de nobete gênê. Partîya ma seba pêvînayîşê bi Ocalanî muracat kerd la Wezîrîya Edaletî cewabêk nêda ma. Heta ke netîce bigêrê ma do Nobeta Edaletî rê dewam bikerê. Çunke tecrîd bingeyê pêro meseleyan o.

Heta ke tecrîdê vera Birêz Ocalanî bêro wedaritene nobeta ma do dewam bikera. Serra 2023yî do biba a serre ke ma do îqtîdarê faşîst, tekperest û dişmenê cinîyan bin bivisnê.Têkoşînê ma xora do 2023 de zî dewam bikero. Ma pêro şaranê xo yê serra newîye de azadîye û haştîye wazenê.''