Vervatoxa Meclîsê Cinîyan ê HDPyî Ayşe Acar Başaran merkezê partîya xo de kombîyayîşê çapemenîye kerd û rojdem ercna.

Qiseykerdişê Başarane ra beşêk wina yo:

''Şar vêşan o la îqtîdar pêro çime û bedçeya şarî dano şerî. Polîtîkaya îqtîdarî merdiman mehkumê vêşanîye û sefaletî kena, bi nê hawayî wazena îradeyê şaran bişikno.Hînî na polîtîka qedîyan. Şer û operasyonî zî do nêeşkê îqtîdarî bixelisnê. 

Zîndanan de tecrîdê Îmraliyî vila beno. Tepişteyê nêweşî sewqê nêweşxaneyan de kelemçekerde yê, maruzê cigêrayîşê rûtî benê. Sey Aysele Tugluk Dezgehê Tipê Edlîyî raporê 'eşkenê zîndan de bimanê' danê tepişteyanê nêweşan. Cinîyê tepişteyî raştê îstîsmar, şîdet, surgun, tecrîd û îzolasyonî benê. Surgun têna tepişteyan rê nê keyeyanê înan rê zî ceza ya.  Keyeyî nobetanê edaletî de têkoşîn kenê. Ma zî do têkoşînê seba tepişteyan rê dewam bikerê.

Ma zî tewrê Dewaya Peymana Îstanbulî bîyî. Ma reyna îfade kenê ke do qetî peymane ra fek vera medê. Ma reyna venga îqtîdarî danê ke wa feshê Peymana Îstanbulî ra fek vera bido. Reyna seba ke derheqê destbendkerdiş û tepiştişanê Gultane Kişanak û Sebahate Tuncel de dîmenî weşanayî vera Platformê Ma do Verê Kişîyayîşê Cinîyan Bigêrê dewaya qefilnayîşî ameye akerdene. Na vera kurdan û cinîyan dişmenî ya. Ma hetê platformî de yê.

Vizêr vera Merkezê Pêroyî yê partîya ma provakasyon ame kerdene. Îqtîdar 2015 ra nata hêrişê partîya ma û kurdan keno. Îqtîdar vano qey o do pê polîtîkayanê xo ma qels bikero.  No provakasyon xîretê çimtersnayîşî û polîtîkaya dişmenî ya. Medyaya îqtîdarî vana verê partî de keyeyî est bîyî. No raşt nîyo. Polîsan verê bînaya ma de çelenk verdayo. Wezîrîya Karanê Zereyî wezîrîye nê wezîrîya propaganda û sûcî ya! 

Bînaya ma de şexsê mi de pêro şarê kurdî ame tehdîtkerdene. Qiseyê 'Ez to mix kena' vera demokrasî yo. Îqtîdar vano qey pê nê kerdişan do ser bikewo. Şima bînaya ma ya Îzmîrî de embaza ma kişte, embazê ma tepiştî, qeyûmî şawitî şaredarîyanê ma la şima dî ke ma verê şima de çok şîyê erdî ro? 

Polîsî ma rê persenê ke hele ma kam ê; ma kurd ê. Ma kedkar, karker, armenî, elewî, cinî yê; ma HDP yê.  Ma reyna visnenê vîrê provakatoran ke êyê ke sey şima bîyê, nika çopê tarîxî de yê. Şima zî do uca ra xo mexelisnê.''