Rêxistina Paştdayîşê Huqûqî yê bi Cinîyan kombîyayîşê çapemenîye de raporê xo yê serê şîdetî yê 6 mengan eşkera kerd. Goreyê raporî nê 6 mengan de Başûrê Kurdîstanî de şîdetê vera cinîyan zaf zêdîyayo.

Rêxistine pare kerd ke goreyê doneyanê înan nê 6 menganê peyênan de 29 cinîyan bedenê xo da adirî ver, 31 cinîyan peynîya cuya xo arde û 22 cinîyî zî ameyî qetilkerdene. Rêxistina Paştdayîşê Huqûqî yê bi Cinîyan venga selahîyetdaran da ke mesuldarîya xo bîyarê ca.

Goreyê raporî 2021 de mehkemeyanê Silêmanî de qet yew dosyaya şîdetê vera cinîyan nêameye cezakerdene. Goreyê bîlançoya Rêxistina Têkoşînê Vera Şîdetî zî 2021 de Silêmanî de 40 cinîyî ameybî kiştene û 62 cinîyan zî peynîya cuya xo arde.

Rêxistina Paştdayîşê Huqûqî yê bi Cinîyan eşkera kerd ke seba dewayanê şîdetê vera cinîyan mehkemeyêka taybete bêra ronayene.