Wextê peyênî de Başûrê Kurdîstanî de cinîyî vera yenê qetilkerdene la ceza nêdîyena kiştoxan. Başûr de şîdetê vera cinîyan tewr zaf mîyanê keyeyî de dîyeno. Destpêkê serre ra nata tewr tay 10 cinîyî bi hawayêkê barbarî ameyî qetilkerdene.

Bajarekê Pêncewînî de 1ê sibate de cinîya ciwane Şenge Ebdulxaliqa 20 serre pê çekêke xo kişt. 6ê sibate de Xaneqîn de domana 17 serre keyeyê xo de xo darde kerd û rixmê pêro xîretan zî dinyaya xo bedilnaye. 7ê sibate de Kelar de Şîlane Hesena 30 serre xo da adirî ver û dinyaya xo bedilnaye.

13ê sibate de Ranya de serebûtêk de guleyî da cinîyêka hewlêrije û cinîye warê serebûtî de dinyaya xo bedilnaye. 15ê sibate de qezaya Behrikî ya Hewlêrî de Hemîne Abdulaya 70 serre hetê lajê xo ra ameye kiştene. Kampa Xanikî ya Dihokî de 7ê adare de cinîya 29 serre hetê camêrdo ke tede zewijnaye bîye ra kişîyaye.

Hewlêr de 9ê sibate de cinîya bi nameyê Serwîna 26 serre hetê kesanê nenasan ra kişîyaye. 11ê sibate de bajarekê Sengerî yê Qeladizê de cenazaya domana 17 serre ameye dîyene ke bedenê ci de rêçê şîdetî estbîyî.

Silêmanî de 16ê sibate de cinîya bi nameyê Meryeme Yakub hetê camêrdê ke tede zewijnaye bîye ra kişîyaye. Reyna 18ê sibate de Silêmanî de cinîye Şînyare Huner hetê camêrdê ke tede zewijnaye bîye ra kişîyaye.

24ê sibate de Kerkûk de cinîyêke xo da adirî ver û dinyaya xo bedilnaye. 2ê adare de Koye de cinîyêke bi hawayêkê şikdarî dinyaya xo bedilnaye. 6ê adare de Hewlêr de cinîye Îmane Samî Mexdîda 20 serre ameye qirkerdene.

Başûr de 2021 de 171 cinîyî ameybî qetilkerdene, 61 cinîyan peynîya cuya xo arde, 86 cinîyan xo vêşna û 24 cinîyan zî xîret kerd ke xo bikişa.