Fermandaranê YJA-Starî ra Batûfa Çekdar hêrişê îşxalî yê dewleta tirke û xoverdayîşê cinîyan Stêrk TV de ercnayî.

Çekdare bale ante xoverdayîşo ke serkêşîya YJA Starî de yeno rayraberdene ser û vat: ''Cinîya kurde koyan de, mewzîyan de têkoşîno tarîxî kena. Vakur û Başûrê Kurdîstanî de serkêşîya YJA Starî de têkoşîn yeno kerdene.  Hêzê cinîyan, nasnameyê YJA Starî  heme mewzîyanê xoverdayîşî de yenê vînayene. Vera îşxal û faşîzmî cinîya xoverdayoxe ya welatperwere têkoşîn kena. No têna vatiş nêyo. Par Heftanîn de xoverdayîşê cinîya kurde ame dîyene. Reyna nê menganê peyênan de Zap, Metîna û Avaşîn de cinîyî bi hewayêkê qerardarî vera hêrişê qirkerdiş û îşxalî têkoşîn kenê.''

Batûfa Çekdar şehîdê Xovedayîşê Zîndanê Amedî zî yad kerdî û vat: ''Ruhê 14ê Temmuze do tim têkoşînê ma de biciwîyo.  No ruh bingeyê şorişê ganîbîyayîşê Kurdîstanî yo. No ruhê ganîbîyayîşî her war û cuya heme kurdan de û têkoşînê azadîye de tim ganî yo û pîl beno. Ruhê Xoverdayîşê 14ê Temmuze ewro mewzîyanê têkoşînî yê gerîlayan û zerîya heme şerwanan û welatperweranê kurdan de ciwîyeno.

Ewro eynî faşîzm vera şaran û têgêrayîşê azadîye yê ma dewam keno. Tewir bibedilîyo zî zîhnîyet seciye yo. Dewlete pozîsyonê hêrişî de ya. Sebebê înan estê. 14ê Temmuze ra nata 39 serrî ravêrtî. A roje ra nata  têkoşîn dewam keno. Çend şino ê vera nê têkoşînî bêçare manenê. Tirkîya de bi nameyê azadîye tiway nêmendo. Bêvengîya vera qirkeridşê kurdan sîstemê îqtîdarî keno meşru. Seba ke îqtîdarê payra vindarnê tim şerê vera kurdan û gerîlayan rojdem de tepişenê. Çend şino hêrişanê xo zêdînenê û huqûqî binpay kenê.''

Çekdare vat: ''Bêşik o ke wazenê verê çalakîyanê bitesîran ê gerîlayan bigîrê. Operasyonanê înanê verênan de ame dîyenê ke rixmê heme teknîkê înan û qorîcî û kontrayan nêeşkayî vera gerîlayan avêr şirê. Gerîlayan heme waran de çalakîyî kerdî. Dêrsimî ra heta Botan û Serhadî çalakîyê pîlî ameyî kerdene. Hêrişê 23ê nîsane ke semedê vilakerdişê sîstemê gerîlayan dîyayî destpêkerdene dewam kenê.

Serranê  2019-2020î de vera Heftanînî operasyonî ameyî kerdene. Wazenê ke Başûrê Kurdîstanî îşxal bikerê. Ê çend vajê ê artêşa pîle ya NATOyî yê zî hêzê înan vera xoverdayîşê gerîlayan çîn o. Na artêşe nêeşkena vera îradeyê kurdan şer bikero. Çeteyê ke binê nameyê multecîyan de Sûrîye ra dîyayî ardene ê vera ma şer kenê. Dewleta tirke qorîcî û çeteyan vera ma dana şerkerdene. Bêşik o ke êyê ke pê pereyî şer kenê nêeşkenê vera şerwananê Apoyîyan şer bikerê.''