Paytextê Almanya Berlin de, Baxçeyê Şîfa yê Hevrîne Xelefî warêkê xoza yo ke hetê Meclîsê Cinîyan ê Dest-Danî ra ronîyayo. Baxçeyê Şîfa yê Hevrîne Xelef ê Meclîsê Cinîyan ê Dest-Danî de cinîyî dîyayîşê wisarî reyde, pê deyîran erdî kenenê û seba ramitişî erdî amade kenê.

Aktîvîstanê Baxçeyê Şîfa ra Terapîsta Domanan Zîlane da zanayene ke cinîyî nê baxçeyî de bê têkilîyanê hîyararşîkan pîya xebitîyenê û tecrubeyanê xo pare kenê. Zîlane vat: ''Yanî armancê ma o yo ke ma dewlete ra azade, pîya û pê hêzê xo çîyêkî bikerê, berhemanê xo bi rayîrê înternetî biresnê cinîyan ê bînan. Ma wazenê bimojnê ke tîya de cuyêka alternatîfe est a.''

Baxçe de cinîyê ke karanê cîya-cîyayan kenê yenê yewca. Nînan ra yew zî Şermîna ke Zanîngehê Frei de derheqê krîzê awe de doktora kena. Şermîne dîyar kerd ke ê baxçeyî de derheqê vaşanê şîfa de qisey kenê. 

Şermîne vat: ''Tîya de cinîyê ciwanî zî ê kokimî zî est ê. Mîsal ma dayîkan ra tay vaşan ser o zanayîşan gênê. Emser ma do vaşanê sey tolik, rêhan ûsn. ser o vinderê. Ma musenê ke kamyew vaş kamyew nêweşî û dejî rê fayde keno. Ma tîya de Flamingo e. V, Komeleya Destan reyde xebatan kenê. Ma pîya berheman ramenê, resnenê.''

Projeyê Baxçeyî 2017 de amebi amadekerdene. 2019 de roja şehadetê Hevrîne Xelef de baxçe abîyo û coka nameyê aye dîyeno baxçeyî. 

Aktîvîsta Dest-Danî Nursele zî da zanayene ke ê hêvî kenê ke no baxçe wa bibo baxçeyê pêro cinîyan û vat: ''Ma tîya de nefesêkî gênê.''

Şermîne eşkera kerd ke Baxçeyê Hevrîne Xelef û tay înîsîyatîfê cinîyan do pîya piramotişêkî bikerê û vat: ''Nameyê pêramotişê ma do bibo 'Utopyayê Viraşteyî.' Pêramotiş do 'Jîngehî' ser o bibo, ma tede xebatanê xo bidê şinasnayene. No pêramotiş do bi paştdayîşê cinîyan qala ci bikero ke hêzê cinîyan senî ekolojî pawenê.''