Paytextê Almanya Berlin de cinîyî do serkêşîya  Îtîfaqê Cinîyan ê Femînîstan ê Enternasyonalîstan de roja çarşemeyî  do saete 14.00 de Frankfurter Tor de bêrê têhet û heta verê Zîndanê Lichtenbergî rayra şirê. Temsîlkara Siwana Meclise Jinên Êzîdî (SMJÊ) yo ke mîyanê îtîfaqî de yo, Nure Alkiş derheqê 8ê Adare Roja Cinîyan ê Kedkaran a Dinya de ANFyî rê qisey kerd.

Alkişe ard ziwan ê emser qehrîyaye dekewenê 8ê Adare û vat: ''Hêrişanê dewleta tirk a îşxalkere Şingal zî tede her ca de dewam kerd. Yew zî 6ê sibate de erdlerz qewimîya. Vera hêrişanê îşxal, barkerdiş û qirkerdişî têkoşînêko bêhempa ame averberdene. Bi têkoşînê Rojhelatê Kurdîstanî slogana Têgêrayîşê Cinîyan ê Kurdan Jin Jiyan Azadî heme dinya ra vila bîye.''

Temsîlkara SMJÊ Alkişe bale ante muhîmîya aktîvîteyanê 8ê Adare yê emserî ser û vat: ''Ma do semedê xurtkerdişê têkoşînê cinîyan û paştîdayîşî panel û semîneran organîze bikerê. Bitaybetî cinîyê êzîdîyî gerek bi kincan, reng, veng û beyraqanê xo serkêşîya rayraşîyayîşî bikerê. Ma bi wayîrvejîyayîşî slogana Jin Jiyan Azadî berz bikerê.''