Endama Koordînasyonê KJKyî Besê Erzîncan derheqê tecrîdê Îmraliyî, hêrişanê îşxalî û xoverdayîşê gerîlayan de cewab da persanê ANFyî. Qiseykerdişê Besê Erzîncan bi kilmî wina yo:

''Rayber Apo 23 serrî yo binê tecrîdî de yo. Xoverdayîş û tewirê ey  metodê azadîye yê. Şorişê Kurdîstanî, şorişê cinîyan pê famkerdişê Serek Apoyî yenê ca. Rayberê ma Îmrali de, gerîlayî Herêmanê Pawitişî yê Medya de, bi hezaran merdimî zîndanan de û şarê ma teber de xo ver danê. Ma sayê nê têkoşînî do azadîye awan bikerê.

Xoverdayîşê gerîlayan ê Kurdîstanî têna xoverdayîşê PKKyî nîyo xoverdayîşê pawitişê nasname, kultur û erdê Kurdîstanî yo. Ewro Zap, Metîna û avaşîn de vera dewleta tirke ya îşxalkere  rayberîya hêzanê YJA-Starî de gerîlayî xoverdayîşêkê bêhempayî kenê, bedelanê giranan danê. Têkoşînê gerîlayan hêrsê vera dişmenî zêdîna. Ma do têkoşînê xo pîlêr bikerê, Kurdîstanê Azadî û cuya azade awan bikerê.

Pozîsyonê PDKyî dûştê gerîlayan o ke no pozîsyon hetê cinî û şarê kurdî ra qetî nêno qebulkerdene. Şarê ma şerêkê muxtemelî yê zereyî ra qerqilîyeno. Mesuldarê na rewşe PDK yo. Wa pêşmergeyî nêkewê na dafike. Gerîlayî pawitoxê şarê Başûrî yê.Ganî PDK cade hêzanê xo waranê gerîlayan ra apey bianco. Dewleta tirke têna dişmena PKKyî nê dişmena pêro kurdan a. Ma Efrîn de dî dewleta tirke se kerdo. Hêrişê dewleta tirke yê vera Mexmûrî zî na çarçewe de yê. Şarê Mexmûrî vera nê hêrişan tewirê xo yê rûmetênî rê dewam keno.

Sere de cinîyê Başûrî ganî şarê Başûrî rayîr nêdê şerê zereyî û vera dewleta tirke wurzê payan ser. Ganî pêro beşê Başûrî hemkarîya PDKyî ya bi Tirkîya bi xurtî rexne bikerê û seba yewîya neteweyîye ya kurdan bixebitê.

Gerîlayî seba azadîya cinîyan zî têkoşîn kenê. Paştdayîşê bi gerîlayan wezîfeyo verên ê cinîyanê Başûrî yo. Ganî tirkmen, ereb, sûryan, êzidîyî û asûrî zî vera dewleta tirke tewirê xo bimojnê. Ganî têkoşîno hempar bêro kerdene.''