Têgêrayîşê Cinîyan ê Azadan (TJA) beyannameyê peynîye kombîyayîşê xo yo ke derheqê cinîyan ê multecîyan de Mersîn de viraşt, eşkera kerd.

Kombîyayîşî de bi vengdayîşê HDP'yî û TJA dezgehê cinîyan, temsîlkarê partîyan, şahîdê multecîtîye, Sazgehê Komeleya Sivîlî û der û dorî û dînamîkanê cîyayan ra kesî ama de bî. Kesê ke beşdarê kombîyayîş bî: Merkezê Paştdayîşê Cinîyan ê Şaredarîya Seyhanî, Sereka Baskanê Cinîyan a CHP'yî ya Mêrsînî  û heyetê aye, Komeleya Cinîyan a Maya, Şahîdê Multecîtîye, Egitim-Sen, Qiseykerdoxa Komîsyona Multecîyan a Sazgehê Caardişê Merkezî yê HDP'yî, DÎK, Hemsereka HDP'yî ya Mêrsînî, Hemsereka HDP'yî ya Edene, Meclîsê Cinîyan a HDP'yî, DAD, TJA, Mêrsîn ÎHD.

TJA'yî eşkere kerd ke no kombîyayîş do şaristananê bînan de bêro kerdene û qerar ame dayene ke komxebatêke do bêra viraştene. Beyannameyê peynîye de ame vatene, " Bi têkoşînê haştîye ya bi merkezê cinîyan merdim eşkeno multecîtî biqedêno."Beyannameyê peynîye de ame vatene, "Multecîyî welatanê ke şîyê de ganî welatîyan reyde wayîrê eynî firsendan bibê û girîng o ke termînê perwerdehîye de seba problemanê înan çareserîyî bêrê dîyene. Bîyayîşê wayîrî yê firsendanê perwerdehîye, seba sazkerdişê cuya newîye û amayoxî girîng o. Seba Sûrîyeyîjanê ke şerî ra vejîyayê û koç kerd bilezî hewceyê firsendanê winasîyan esto."

Beyannameyê Peynîye de meseleyê ziwanî yê multecîyan ame mojnayene û ame vatene, "Meseleyê ziwanî, cinîyan komele ra îzole keno û înan teyna verdeno. Keno ke cinîyî û komele yewbînan ra bawer nêkenî. Şîdeto cînsîyetî û îşkence zêdêr vînenî. Nasnameyê înan yenê kêmkerdene, nêşkenê bihêvî bibê û bawerîya xo bipawê, mabenê bêdîyarîye de ciwîyenî. " Beyannameyê peynîye de ame îfadekerdene, "Dinya cayê îşxalkeran nîya, cayê ma yê pêroyînan a ke ma tede mird benê, ciwîyenê. Bi veravindertişê şerî û têkoşînê azadîya cinîyan merdim eşkeno şerî biqedêno û têkoşînê haştîye yê bi merkezê cinîyan merdim eşkeno multecîtî zî biqedêno."