Wendekara Zanîngehê Munzurî Gulîstane Doku 5ê çeleyê 2020î ra nata, Dêrsim de 'vînîbîyaye' ya. Tehqîqatê serebûtî polîs û leşkerê dewleta tirke qestî ra îxtîmalê 'xokiştişî' ser de vindertî û xebatê cigêrayîşî Çemê Munzurî de sînordar mendî.

Tewr peyên tehqîqat de vergumano sereke Zainale Abarakovo ke babîyê ci Engîn Yucel polîs o, 17ê adare de Antalya de amebi destbendkerdnee la dima vera dîya.

Avûkate û Îdarekera HDPyî ya Amedî Pîrozhane Karalî derheqê babete de Jinnewsî rê qisey kerd.

Pîrozhane Karalî pare kerd ke tehqîqatê Gulîstane Doku de xebatê cigêrayîşî bi qîmî nêameyî kerdene û vat: ''Têna binê awe de Gulîstane ameye cigêrayene. No bi xo mojneno ke xebatî bi hawayêkê cidîyî nêameyî kerdene.  Nêame cigêrayene ke Gulîstane kişîyaya yan nê. No zî eşkera keno ke yeno waştene ke serê serebûtî bêro girewtene.  Ganî nê tehqîqatî de pêro ferdê keyeyê Abarakovî îfade bidê. Ganî komel û keyeyê Gulîstane derheqê tehqîqatî de bi hawayêkê hîrayî bêrê agahdarkerdene.''

Pîrozhane da zanayene ke dozgerîye zî dosyaya tehqîqatî qestî ra aver nêbena û vat: ''Zainal vergumano sereke yo la dozgerî na babete de tehqîqatêko hîra nêkerd. Eke Gulîstane binê awe de bibîyêne bedenê ci bîyêne mor û vejîyayêne serê awe. La çîyo winasên nêbi. No zî eşkera keno ke Gulîstane binê awe de nîya. Coka ganî binê awe de nê teber û her ca de Gulîstane bêra cigêrayene û tehqîqat bi hawayêkê hîrayî bêro kerdene.''