Mehsulo ke erazîya 50 donimîne de ame hesadkerdene ke hetê Şaredarîya Bîsmîlî ra amebi dayene bi 50 keyeyan, bazar de ame rotene. Aqîto ke pê keda cinîyan ame berardene bi nameyê "Siyajin" do bêro rotene.
Qezaya Bîsmîlî ya Amedî de serra 2014'an de pê projeyêko ke hetê Partîya Haştîye û Demokrasîyî (BDP) ra ame viraştene erazîyê vengî yê hetê Çemê Dîcle de ameyî ramitene. Proje hetê qeyûmî ra amebi vindertene û dimayê weçînayîşê Adare reyna ame dewamkerdene. Şaredarîya Bîsmîlî emser erazîya 100 donimîne daye 50 keyeyan. Keyeyan hesadê xo hefteya vîyarte de kerdî.
Mehsulî bi Erjanî Yenê Rotene
Cinîyanê ke menga Gûlane de dest pê ramitişî kerd, mehsulê xo bazaran de şarî rê mojnayê. Cinîyî saetanê rewî yê serê sibayî ra mehsulanê xo danê arê û înan şawenê bazaranê qezaye rê. Cinîyê ke menga Gûlane de hêgayanê xo ramenê, pê engura xo ke Çemê Dicle de ramenê dest pê kerd aqît virazenê.
Nê cinîyanê kedkaran ra Behîye Sevime vat: "Ma mehsulê xo ke kedayêka pîle mojnenê ci bi erjanî şarî rê roşenê. Şar zaf eleqa dano mehsulanê ma. Emser ma zaf çî roşenê." Sevîme îfade kerd ke pê peranê mehsulanê xo paşt danê debarê keyeyanê xo û veng da ke ganî no proje bêro hîna zêde kerdene.
