Hemsereka Pêroyî ya HDPyî Pervîne Buldan Grûba Cinîyan a Parlamentoyî de qisey kerd.

Buldane sere de Serekê HEPî Vedat Aydino ke 30 serrî verê cu 5ê temmuza 1991î de  ame remanayene û qetilkerdene yad kerd û vat: ''Zîhnîyetê ke Aydin qetil kerd 17ê hezîrane de Îzmîr de vejîya verê ma. Ez Denîza ma zî bi hurmet yad kena.  Zîhnîyeto ke cinîyan, kurdan û muxalîfan rê vano 'terorîst' û sey hedefî ramojneno, nê zîhnîyetî Denîze qetil kerd. Ma nê zîhnîyetî hole nas kenê. Xora ê zî ma nas kenê. Ê zaf hole zanê ke ma verê zextî de çok nêdanê û têkoşînî ra peyser game nêerzenê. Ez reyna tîya ra ver bi rîyê înan qîrena. Qirkerdişê Îzmîrî têkoşînê ma pîlêr kerd. Şima nêeşkenê verê ma bigêrê. Her gano ke şima ma ra girewto, şima do verê huqûqî de hesabê ci bidê.''

Buldane bale ante hêrişê îqtîdarî yê vera cinîyan ser û wina dewam kerd:  ''îqtîdarê camêrdî dî ke cinîyê rixmê heme hêrişan peyser game nêerzenê. Ma tîya ra cinîyê ke her war de xoverdayîş kenê, înan selam kenê. Înanê  ke vatêne qey ê Pêkerdişê Îstanbulî fes kenê û cinîyî qebûl kenê zaf xeletîyayî. Cinîyan milê xo çewt nêkerd û vera înan vejîyayî meydanan û barîkatê faşîzmî rijnayî. Wa pêro bivînê  ke qedexe, zext û polîtîkayê şima yê şîdetî nê xoverdyaîşê cinîyan ê meydanan do ser bikewo. Cinîyê wayîrê destkewteyanê xo yê ke bi keda pîle fînayî dest vejîyenê.

Wextê îqtîdarê AKPyî de nêzdê 16 hezar cinîyî ameyî qetilkerdene. Şîdet zêdîya. Têna goreyê donayanê wezîrîye 145 hezar 939 dosyayê îstîsmarê domanan ameye akerdene.  Nêzdê 2 mîlyon cinîyan  seba ke merê kiştine dewlete ra pawitiş waşt. Hûmara cinîyan ê bêkaran têna goreyê donayanê fermîyan  se ra 45 a.  Cinîyê ke wextê pandemî de karî ser o nêyê hûmara înan panclab zêdîyaye. Heme heqê cinîyan hetê hukmatê AKPyî ra ameyî tehdîtkerdene. AKP felakato tewr pîl o ke cinyan ser ameyo. Ma do AKPyî bidê war. Wa şikê çewî/e çînêbo  cinîyî do nê felaketî rayraberdişî ra wedarê. Îqtîdarê AKP-MHPyî do vîjnayîşo verên de bêro feskerdene.

Ma têkoşînê xo de qerardar ê. Ma do muxalefetê cinîyan ê demokratîkî bikirişê îqtîdar. Coka ma rêxistikerdişê xo gird kenê. Sefanê xo kenê xurt. Ma çarçewa Kampanyaya 'Semedê Cinîyan Edalet'  têhetameyîşanê 'Feqîrîya Cinîyan rê Nê' kenê. Her hetê welatî de ma cinîyan reyde yenê yewca û derheqê probleman û çareyanê ci de qisey kenê. Her pêvînayîşê xo ra dima ma eynî çî vat 'ganî no sîstemê camêrdî bêro bedilnayene.' Ma pê hêzê xo yê eşkenê nayî bikerê. Ma têkoşînê xo yê hemparî, yewbîyayîşî eşkenê nayî bikerê. Ganî ma wayîrê sîyasetê cinîyan bivejîyê û destkewteyanê xo bipawê.

Seke şima zanê wazenê partîya cinîyan HDPyî biqefilnê ke cinîyan sîyasetî ra tesfîye bikerê. Coka bîlasebeb Dewaya Kobanê vetê meydan. Pê na dewa wazenê sîyasetê cinîyan muhakeme bikerê. La raştîye de mehkeme de cinîyî zîhnîyetê camêrdî û hukme camêrdî muhakeme kenê. Sebahatê Tuncel, Ayla Akat Ata, Gultan Kişanak, Fîgene Yuksekdag mehkeme de pê vatişanê xo ramojenê ke kam kamî muhakeme keno.''

Buldane veng kerd hukmatî vat: ''Ma zanê şima şaro ke bîat keno wazenê. Komelê tersanêk wazenê. Cinîya bêçare ya ke şîdetî ra bîya razî wazenê. Muxalefetê bêvengî wazenê. Welatêkê bê HDPyî wazenê. Eslê xo de ma zaf hole zanê şima çi wazenê. La ma sey cinîyan vanê ke şima înan do hewnê xo de bivînê. Ma verê zulmî de çok nêdanê û zalîman rê minet nêkenê.Têkoşînê cinîyan do nê welatî ke şima kerdo tarî, roşn bikero. Hêzê cinîyan  do welatî bixelisno. Ma do pêro pîya têkoşîn bikerê û ser bikewê.''