Hemsereka Pêroyî ya HDPyî Pervîne Buldan, Vervatoxa Meclîsê Cinîyan ê HDPyî Ayşe Acar Başaran û aktîvîstanê TJA bi wesîleya 8ê Adare Roja Cinîyan ê Kedkaran ê Dinya, warê xeyman ê Koordînasyonê Cinîyan ê Meclîsê Wendekaranê Demokratîkan ê qezaya Defne ya Hatayî de bi şîarê ''Paştîdayîşê Cinîyan Dano Ciwîyayene'' eşkerayîye daye.

Buldane vat: ''Emser 8ê Adare de dej, şîn û hêrsê ma vejîyayî vernî. Eynî wextî de paştîdayîş est o. Cinîyî roja verên a erdlerzî ra semedê paştîdayîşî her ca de bê ke birînan bipeşê. Hela  verên a ke ma vejîyayî warî her kesî yew çî vatêne, îdarekarê nê welatî hay ça. Ma pêrune dî ke ê meydanan de nêbî. Ma û cinîyî her ca de bê. Êyê ke wazenê nê welatî de paştîdayîşî xurt bikerê ê bibî. Na yewîye rixmê her çîyî, rixmê heme defan û bedelan zaf qiymetin a. Ez tîya ra heme cinîyan rê, cinîyan ê femînîstan, meclîsê cinîyan ê HDP, heme cinîyan ê zerrîwazîyan rê spas kena. Seba ke binateyê wayan de pirdêko gird nayo ro ma pêrune rê mînetdar ê. No pirdo qiymetin do çirey merijîyo. Mîyanê nê paştîdayîşî de hema TIRê Morî ke rayîr de yê est ê.

Cinîyê erjîyayeyî, rojdemê Tirkîya çi beno wa bibo, rojdemê erdlerzî  do çirey mebedilîyo. Êyê ke wazenê rojdemî bibedilnê wa bizanê ke çew nêeşkeno bikewê verê nê rojdemî. Ma do destûr medê ke birîn û dejê erdlerzî bêrê vîrakerdene. Ma zanê ke hema waranê erdlerzî de hewcadarîyê sey awe, xeyme û hewcadarîya cinîyan, domana û extîyan hewcedarîyê muhîmî est ê. Wa çew goreyê xo rojdemî mebedilno. No îqtîdar do pê hêzê cinîyan bi hesabdayîşî şiro. Ma sey HDPyî do çîyo ke destê ma ra yeno bikerê ke no îqtîdar şiro. Hinî nê welatî de tehamulê kesêkî nê îqîtarî rê nêmenda. Nika wextê girdkerdişê paştîdayîşî yo. Bi vatişê ‘Jin jiyan azadî’ ma yewîye û paştîdayîşî xurtêr bikerê. Ma do şima têna meverdê, ma soz danê ke ma do birînanê xo pîya bipeşê.''