Zeynepe Celalîyana seba ke endama Partîya Cuya Azade ya Rojhelatê Kurdîstanî (PJAK)  ya 14 serrî yo zîndanê Îranî de yena tepiştene, merdi û embazê ci bi mengan o tira xebere nêgenê.

Goreyê zanayîşê ke Sendîkaya Tepişteyanê Sîyasîyan dayî de Celalîyan tewr peynî Zîndanê Yezdî rê ameye surgunkerdene û menga gulane ra nata tira xebere nêameye girewtene. Sendîka vat îdareyê Îranî seba ke rêçê aye vîn bikero zîndanê Yezd, Kirmanşah, Urmîye û dima ra reyna Zîndanê Yezdî rê surgun kerd. Sendîka bale ante ser ke rewşa Celalîyan zaf xirab a û çîyê tibbîyê ke hewceyê ci pê esto ê zî nînê dayene.

Zeynep Celalîyan mektûba xo ya peyêne de vatbi: ''Eke yew cinî azadîye rê aye bîyî qet yew zext nêeşekno aye rê çok bido dayene.''