Cinîyê ke rayberîya cuye kenê, her warê cuye de rengê xo mojnenê. Havva Aksala (46) ke qezaya Pîranî ya Amedî de ciwîyena û debara xo bi dikanê sebze û meyweyan kena zî warê ekonomî de rengê xo mojnena. Havvaya ke 5 serrî nê karî kena. 

Havva Aksal Jinnewsî rê qisey kerd û bale ante karê xo ser. Havva vat: "Mi û nacnîya xo ma waştêne karêk de bixebitê û ma no ca dî. Ma wina dest pêkerd. Destpêk de ma zaf baş nêbî. Ma tîcaretî ra fam nêkerdêne. Çunke ma her wext keye de bîyî û ma serê karê ekonomî de nêvindertîbî. La dima ma kar fam kerd û ma xo aver berd. Êdî karo ke cinîyî nêeşkenê bikerê çin o. Destpêk de  çew bi başî nêzdîyê karê mi nêbîyêne. Çunke karê dikanê sebze û meyweyan her wext sey karê camêrdan dîyayêne. La wextêkî ra dima hînî ê zî musayî karê mi."

Havva serê zehmetîya karê xo zî de vinderte û vat: "Ma hema zî karê xo de hîn zehmetîyan ancenê. Sey girewtişê sebzeyan yan zî karê teknîkî de zehmetî virazîyenê. La bawerî û cesaretê ma bi ma esto, ma do xo aver berê. Gama ke cinîyî semedê destpêkî game bierzê, vînenê ke çiqas rayîr derbaz kerdo. Ganî cinîyî bieşkê vajê ez eşkena bikerî û ez do bikerî. Xebata cinîyan bi rengê cinîyan weştir a."

 Havva tewr peyîn wina vat: "Mi tu wext nêwaşt ke zereyê keye de tena ronişa, firaq û cilan bişiwa. Ganî her tim na cuye de merdim cayê xo bigîro û peyê cuyêka manadare de bo. Ez 46 serrî ya la wendekar a. Beno ke tay erey menda la mi waştişê xo ca ard. Goreyê mi ganî heme cinîyî bicesaret bibê û peyê waştiş û xeyalê xo ra şorê. Bi taybetî zî hetê wendiş û ekonomîya xosere de ganî cinîyî her wext rayberîye bikerê."