Platformê Cinîyan ê Dêrsimî semedê Gulîstane Doku ya ka 5 çeleyî ra nata vînîbîyaye ya eşkerayîyêke daye.

Eşkerayîya ke Meydanê Seydî Rizayî de ameye kerdene de bi nameyê platformî Tuba Apaydin qisey kerd. Apaydine vîst vîrê ke şîdet û tecawuzê vera cinîyan ke demo peyên de zêdîyayo, Dêrsim de bi hawayêkê sîstematîkî  dewam keno û vat: ''7 aşman ra zafêr o têna awe de gêrenê Gulîstane. Walîyo verêne ê Dêrsimî Tuncay Sonel û amîranê tay dezgehan timûtim senî ke Gulîstane xokişto ramojna. Reyna nê demî de keyeyê Gulîstane rê zî zext ame kerdene ke binê kotnrolî de bêro tepiştene. Hendê şikî estê qey derheqê Zaynal Abakarovî de tehqîqatêko bitesrî çîn o? Ma do persayîşê aqibetê Gulîstane Doku cameverdê û hesabê naye bipersê.''

Waya Gulîstane Doku, Aygul Doku zî vat: ''Mavajê qey do no cayê şima de bimano. Ma do peynîya naye cameverdî. Ez do mehkemeyan de vejê vera şima. Gerek derheqê heme keyeyê Zaynal Abakarovî tehqîqat bêro kerdene. 233 rojî yo ke bajarêkê qickekî de ma Gulîstane nêvînenê. Ma do heqê kênaya xo çeteyan rê meverdê. Wa her kes bizano ke ma do tîya ra meşirê, cigêrayîşê Gulîstane rê dewam bikerê. Eke hewce bikero ma do şirê Anqara. Ma do şewe û roje mevajê bigêrê Gulîstane. Heta ke ma  aye mevînê vindertiş çîn o.''