Têgêrayîşê Cinîyan ê Azadan (TJA) TJA serê mezelê Endama Merkezê Cigêrayîşî yê  Jineolojî Nagîhane Akarsela ke  Başûrê Kurdîstanî de hetê dewleta tirke ra ameye qetilkerdene de dest pê çalakîyanê 25ê Teşrîna Peyêne Roja Têkoşînê Vera Şîdetê Serê Cinîyan kerd.

Cinîyê ke mezalanê dewa Xalîkanî yê qezaya Cihanbeylîyî yê Konya de ameyî têhet  bi şîarê ''Vera Faşîzm û Qirkerdişê Cinîyan Nika Wextê Azadîye ye yo'' startê çalakîyanê 25ê Teşrîna Peyêne da.

Vervatoxa Meclîsê Cinîyan ê HDPyî Ayşe Acar Başaran, wekîlî Fatma Kurtulan, Gulistane Kiliç Koçyîgit, Şevîne Coşkun, endanê Merkezê Cigêrayîşê Jîneolojî, rêxitinê HDPyî yê Anqara û qezayanê ci, merdimê Akarsele û xeylêk cinîyî tewrê zîyaretê mezalan bîyî. Cinîyî pê  kontrolê Arêdayîşê Hayîdarîyanê Pêroyîyan (GBT) kewtî dewe û binê ablûqaya polîsan de mezelê Akarsele pê vilikan xemilna.

Aktîvîsta TJA Derya Arslana ke aktîvîte de qisey kerd ard ziwan ke Akersele têkoşînê heqîqetî da û ê zî do nê têkoşînî bidê domnayene.

Vervatoxa Meclîsê Cinîyan ê HDPyî Ayşe Acar Başaran zî bale ante têkoşînê Nagîhane Akersel ser û vat: ''Hemraya ma Nagîhane Silêmanî de pê 11 guleyan ameye qetilkerdene. Nê guleyî vera têkoşînê cinîyan ê kurdan ê vera sîstemê serdestî ameyî eştene. Sere de Kurdîstan heta heme dinya de cuyeya seyyewbîne bêro înşakerdene ma do têkoşîn bikerê. Ma heta ewro zaf rey ameyî qetilkerdene, hepskerdene, raştê şîdetî ameyî la ma çirey têkoşînê azadîye ca nêverda. Ma ewro zî reyna sozê têkoşînê azadîye danê.''

Cinîyan dima ra dayîka Nagîhane Akersel zîyaret kerd.