Têhetameyîşê  ''Feqîrîya cinîyan rê nê ''yê Meclîsê Cinîyan ê HDPyî no yewşeme Mêrdîn de dewam kerd.

Vervatoxa Meclîsê Cinîyan Ayşe Acar Başaran, Vervatoxa Partîye Ebru Gunay, Wekîle Semra Guzel, hemserek û hemşaredarê bajar û qezayan ê Mêrdînî zî tede xeylêk cinîyan ê HDPyî Qoserê Mêrdînî cinîyê ke hegayanê qerpuze, lazut  û xîyarî de xebityenê zîyaret kerdî û problemê cinîyan ke germ kilij de binê 45 derece de xebityenê goşrarî kerdî.

Cinîyan xebetkaran karo biasayîş waşt. Cinîyê ke zafê înan wendekar ya zî mezune lîsê û unîversîte yê  saete 6:00 ra heta 18:00 xebiteyenê û 90 TL genê. Cinîyan ard ziwan ke ê heta şan xebityenê la qezencê înan kêm o înan rê nêvejeno, ê nêeşkenê faturayanê xo bidê.

Ebru Gunaya ke tîya qisey kerd ard ziwan ke ê do tim paştî bidê cinîyan û vat: ''Cinîyî her hetî ra tengayî ancenê. Ma do pêro pîya têkoşîn bikerê û nê probleman çareser bikerê. Cayo ke vengê şima nêreseno ci de ma do vengê şima bidê eşnawitene.''