Meclîsê Cinîyan ê HDPyî yê Îzmîrî meydanê Alsancakî de bi eşkerayîyêke startê 25ê Teşrîna Peyêne Roja Têkoşînê Vera Şîdetê Serê Cinîyan da. Eşkerayîye de pankartî ameyî akerdene û sloganê sey 'Camêrdî kişenê, dewlete pawena', 'Biciwîyo Têkoşînê Cinîyan' ameyî vatene. 

Vervatoxa Meclîsê Cinîyan ê HDPyî Ayşe Acar Başaran, Wekîlî Zuleyha Gulum, Oya Ersoy û Serpîke Kemalbay zî tewrê eşkerayîye bîyî. Başarane eşkerayîye wende û vat: ''2008 ra nata tewr tay 4 hezar û 200 cinîyî ameyê qetilkerdene. Nê doneyî netîceya polîtîkayanê îqtîdarî ya. Dewlete herinda ke vera şîdetî têbigêra, Peymana Îstanbulî betal kerde û cinîyê ke  vat 'Peymana Îstanbulî yê ma ya' raştê tehqîqatî yenê. 

Ma do budçeya cinîyan awan bikerê, Wezîrîya Cinîyan awan bikerê. Hêrişê îqtîdarê camêrdî çend bizêdîyê ma zî do hende xo ver bidê û têkoşîn bikerê. Ma şîdetê camêrd-dewlete rê vajê 'no pasaran.' Ma do peynîya faşîzmî bîyarê û hêvî pîl bikerê. ''